Пад такой назвай у Цэнтры сацыяльнага абслугоўвання насельніцтва Дзятлаўскага раёна прайшла сустрэча наведвальнікаў аддзялення дзённага знаходжання для грамадзян пажылога ўзросту і комплекснай падтрымкі ў крызіснай сітуацыі і іх сяброў з Карэліцкага раёна.
Варта адзначыць, што “міжраённае сяброўства” аддзяленняў пачалося ўжо даўно і некалькі месяцаў таму дзятлаўчане наведвалі з культурным візітам карэліцкую зямлю.
Падобныя мерапрыемствы ладзяцца ў рэгіёнах у рамках Нацыянальнай стратэгіі Рэспублікі Беларусь “Актыўнае даўгалецце-2030”, скіраванай на стварэнне ўмоваў для пашырэння ўдзелу пажылых людзей у жыцці беларускага грамадства, іх сацыяльнай інтэграцыі, уключэння ў культурныя, адукацыйныя і сацыяльныя сферы.
Каб сустрэча на Дзятлаўшчыне атрымалася не толькі цікавай, але і музычнай, яе падтрымалі работнікі культуры нашага раёна – Таццяна Шостка, Аксана Кашляк, Іван Кашко. Ладзілася шмат конкурсаў, якія падарылі ўдзельнікам бадзёрасць і добры настрой, увагу многіх прыцягнула выстава творчасці “Нашы рукі не для суму”. Свае ўменні ствараць прыгажосць і быць элегантнымі ў любой жыццёвай сітуацыі прысутныя прадэманстравалі і праз моднае дэфіле “Жанчына на рабоце і ў выхадны дзень”. Дзятлаўчане і госці з Карэлічаў з задавальненнем абмяняліся падарункамі, у тым ліку песеннымі, а напрыканцы за кубачкам чаю ў неафіцыйнай абстаноўцы змаглі падзяліцца навінамі, рэцэптамі любімых страваў і проста пагутарыць на розныя тэмы. Па словах удзельнікаў, сумеснае мерапрыемства можна ацаніць на вышэйшы бал.
Ірына СТЫРНІК
Фотаздымкі прадастаўлены загадчыцай аддзялення Галінай КАСЦЮК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
