У сакавіку сваё 75-годдзе сустрэў заслужаны работнік нашага раёна, былы начальнік раённай інспекцыі дзяржтэхнагляду Уладзімір Маскаль.
Павіншаваць юбіляра і ўручыць высокую дзяржаўную ўзнагароду на Дзятлаўшчыну прыбыў начальнік Галоўнага ўпраўлення тэхнічнага прагрэсу і энергетыкі Міністэрства сельскай гаспадаркі і харчавання Рэспублікі Беларусь Станіслаў Карповіч.
– Вы – чалавек працы, усё жыццё прысвяцілі рабоце ў дзяржаўным тэхнічным наглядзе, – звярнуўся ён да юбіляра. – Па даручэнні намесніка прэм’ер-міністра Рэспублікі Беларусь Леаніда Зайца, міністра сельскай гаспадаркі Сяргея Барташа і ад усёй інжынернай службы нашай краіны хачу павіншаваць вас з юбілейным днём нараджэння, пажадаць здароўя, доўгіх гадоў жыцця і мірнага неба над галавой. Усяго вам найлепшага.
За шматгадовую плённую добрасумленную працу, высокі прафесіяналізм, значны асабісты ўклад у развіццё аграпрамысловага комплексу Уладзімір Маскаль быў адзначаны Ганаровай граматай Міністэрства сельскай гаспадаркі і харчавання Рэспублікі Беларусь.
Да віншаванняў далучыўся старшыня раённай арганізацыі Беларускага прафсаюза работнікаў аграпрамысловага комплексу Уладзімір Казак, а таксама сённяшнія работнікі ўпраўлення сельскай гаспадаркі і харчавання райвыканкама.
Уладзімір Маскаль нарадзіўся ў лясным краі, у вёсцы Пушча Ліпічанская. Старэйшы сын у сямідзетнай сям’і, з юных гадоў быў апорай і падтрымкай для сваіх родных. Рана зазнаўшы сялянскую працу, ужо тады вырашыў, што прадоўжыць справу бацькоў у сельскай гаспадарцы.
Уладзімір Уладзіміравіч атрымаў спецыяльнасць інжынера-механіка ў Беларускай дзяржаўнай сельскагаспадарчай акадэміі. З 1977 года ён узначальваў раённую інспекцыю дзяржтэхнагляду на працягу доўгіх 34 гадоў, пабачыў, як за гэты час пераўвасобіліся сельгаспрадпрыемствы раёна.
– На той час тэхнікі ў гаспадарках было вельмі шмат, толькі адных камбайнаў не менш як па 12, але не энерганасычаныя, а малой магутнасці. Была добрая забяспечанасць кадрамі: мне заўжды вельмі падабаўся падыход да справы спецыялістаў і механізатараў, адносіны да сваёй справы і машын. Выконвалі задачы без вялікай спешкі, але ўсё паспявалі, – расказаў Уладзімір Маскаль.
– Што, на вашу думку, змянілася цяпер?
– Час стаў больш інтэнсіўным. Не сакрэт, што сёння машынна-трактарны парк сельгаспрадпрыемстваў больш магутны і шматфункцыянальны. У кожнай гаспадарцы механізатары – гэта не проста трактарысты, а высокакласныя спецыялісты, якія павінны граматна эксплуатаваць тэхніку і дасканальна разбірацца ў тэхналогіі.
На заслужаным адпачынку Уладзімір Маскаль не сумуе: ва ўласным доме, які разам з сям’ёй некалі пабудаваў у Дзятлаве, займаецца прысядзібнай гаспадаркай і добраўпарадкаваннем, з нецярпеннем чакае сваіх блізкіх у госці на сямейныя святы.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
