Выхаванцы Дзятлаўскай дзіцяча-юнацкай спартыўнай школы паказваюць высокія вынікі на абласных і рэспубліканскіх спаборніцтвах.
Адно з нядаўніх дасягненняў – другое месца ў турніры Гродзенскай вобласці па міні-футболе. Пра поспех каманды і дзіцяча-юнацкі футбол на Дзятлаўшчыне расказаў трэнер Уладзімір Ганчар:
– У 2023 годзе была заснавана спартакіяда Гродзенскай вобласці па міні-футболе, мы прымалі ў ёй удзел другі год запар камандай 2012-2013 гадоў нараджэння. Правялі 11 гульняў на базе пляцоўкі ў горадзе Навагрудку, стварылі пераможную серыю ў 8 сустрэчах запар і ўжо за 3 туры да завяршэння спаборніцтваў ведалі, што ўвойдзем у прызёры. Заўважу, што сапернікі былі сур’ёзныя, тым не менш каманда вярнулася на Дзятлаўшчыну з сярэбраным вынікам турніру сярод 12 удзельнікаў. За каманду Дзятлаўскай ДЮСШ выступалі: Мацвей Кашко, Уладзіслаў Сёмуха, Кірыл Лагун, Мацвей Губко, Цімафей Нічыпаровіч, Дзмітрый Сёмуха, Аляксандр Свіб, Данііл Бірук, Аляксандр Белуш, Мацвей Кедзік, Паліна Літавар.
– З чаго складаюцца перамогі?
– З вялікай сілы волі і рэгулярных трэніровак, якія ў нас праходзяць тры разы на тыдзень па паўтары гадзіны. Але ёсць такія апантаныя футболам хлопцы, якія наведваюць трэніроўкі са старэйшымі школьнікамі або самі збіраюцца на стадыёне “Колас” у пазакласны час. Да поспеху юных футбалістаў прывяла вялікая самааддача і работа трэнерскага саставу, у які ўваходзім я, малады спецыяліст Яўгеній Белавус (г. Дзятлава, аг. Гезгалы) і тытан футбола з 25-гадовым стажам Аляксандр Кавальчук (п. Казлоўшчына).
– Што чакаць у футбольным жыцці раёна сёлета?
– Трэці год на Дзятлаўчыне рэалізоўваецца праект “Чэмпіён”, сёлета ён зменіць фармат (пройдзе ў выглядзе 4-х фестываляў) і стане абласным. Да яго далучацца школы раёна, дзе актыўна падтрымліваюцца футбольныя традыцыі. Дзятлаўчане і госці раёна сем’ямі далучацца да праекта Беларускай федэрацыі футбола “Тата, мама, я – футбольная сям’я”. Ужо мы заявіліся на чэмпіянат рэспублікі па футболе на палове поля камандамі дзяўчынак у двух узростах – да 13 і 15 гадоў. Апошнія тры гады дзятлаўчане ўтрымліваюць тытул пераможцаў рэспубліканскага турніру “Бітва пляцовак”, сёлета плануем пацвердзіць гэта званне.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
