У нашым раёне прадаўжаецца рэспубліканская дабрачынная навагодняя акцыя “Ад усёй душы”, якая дорыць клопат і ўвагу прадстаўнікам старэйшага пакалення.
З гэтай нагоды сацыяльныя ўстановы Дзятлаўшчыны з пажаданнямі і падарункамі наведалі госці – старшыня Гродзенскага абласнога аб’яднання прафсаюзаў, член Савета Рэспублікі Нацыянальнага сходу Рэспублікі Беларусь Віктар Лісковіч, старшыня Гродзенскай абласной арганізацыі прафсаюза работнікаў аховы здароўя Уладзіслаў Галяк, намеснік старшыні камітэта па працы, занятасці і сацыяльнай абароне Гродзенскага аблвыканкама Аляксандра Гарачова.
Разам з намеснікам старшыні райвыканкама, дэпутатам раённага Савета дэпутатаў Вадзімам Бяляткам, старшынёй раённага аб’яднання прафсаюзаў Аляксандрам Дубовікам і начальнікам упраўлення па працы, занятасці і сацыяльнай абароне райвыканкама Аленай Васкель яны наведалі Казлоўшчынскі псіханеўралагічны дом-інтэрнат для састарэлых і інвалідаў.
Дырэктар установы Ігар Ціхан пазнаёміў гасцей з умовамі, якія створаны для пражываючых, расказаў пра сістэму медыцынскага абслугоўвання, побыт, захапленні, сярод якіх – вышыўка, стварэнне карцін і вялікіх мадэляў тэхнікі. Для гасцей падрыхтавалі невялікую канцэртную праграму.
Віктар Лісковіч павіншаваў пажылых насельнікаў інтэрната з Новым годам і Калядамі, а тых, хто кожны дзень у клопатах аб іх здароўі і дабрабыце – з надыходзячым Днём сацыяльнага работніка.
– З ініцыятывы Прэзідэнта Беларусі Аляксандра Лукашэнкі ў навагоднім календары беларусаў з’явілася такая цёплая і добрая акцыя “Ад усёй душы”, у час якой мы можам надаць яшчэ больш увагі людзям шаноўнага ўзросту, павіншаваць іх са святамі, зрабіць прыемныя сюрпрызы, – заўважыў Віктар Андрэевіч.
Уладзіслаў Галяк адзначыў, што з новага года ў кожнай абласной арганізацыі прафсаюзаў з’явіліся свае падшэфныя сацыяльныя арганізацыі. Разам яны ўручылі грашовы сертыфікат наміналам 1000 рублёў на паляпшэнне матэрыяльна-тэхнічнай базы дома-інтэрната кіраўніку ўстановы.
Наступным пунктам маршруту дабрачыннай акцыі стала Казлоўшчынскае аддзяленне кругласутачнага знаходжання для грамадзян пажылога ўзросту і інвалідаў, дзе цяпер знаходзяцца 25 жыхароў, якія атрымліваюць дапамогу і клопат ад сацыяльных работнікаў.
Віктар Лісковіч адрасаваў пенсіянерам пажаданні дабра, утульнасці і моцнага здароўя, уручыў падарункі ад прафсаюзаў найстарэйшай жыхарцы Дзятлаўшчыны 105-гадовай Юліі Гульнік, якая ў хуткім часе адзначыць свой чарговы дзень нараджэння.
У сваю чаргу Аляксандра Гарачова выказала словы ўдзячнасці ад камітэта па працы, занятасці і сацыяльнай абароне аблвыканкама кіраўніцтву Дзятлаўскага раёна на чале са старшынёй Андрэем Садоўскім.
– Шчырае дзякуй вам за тое, што аказваеце падтрымку людзям пажылога ўзросту не толькі ў час навагодняй акцыі, а і на працягу ўсяго года, – адзначыла Аляксандра Сяргееўна. – У мінулым годзе на патрэбы гэтай установы было выдзелена 30 тысяч рублёў, на якія абноўлена мэбля, праведзены рамонт. Мы вельмі цэнім супрацоўніцтва з вамі і ўсё тое, што вы робіце для дзятлаўчан.
Таксама яна ўручыла пачастункі для жыхароў аддзялення, ад прафсаюзаў Гродзеншчыны яны атрымалі бытавую тэхніку і пасцельную бялізну.
У Дзятлаўскім цэнтры сацыяльнай абароны насельніцтва дарагіх гасцей сустракалі народнымі песнямі пад баян удзельніцы аматарскага клуба для людзей сярэбранага ўзросту “Нам гады не бяда”. Прафсаюзных лідараў павітала дырэктар цэнтра Таццяна Нікіпорчык, яна расказала, што людзі пажылога ўзросту наведваюць тут розныя аб’яднанні па інтарэсах.
– У коле аднадумцаў людзі розных прафесій: дактары, эканамісты, культработнікі і былыя кіраўнікі арганізацый – усе, хто сёння не губляе бадзёрасці духу і мае актыўную жыццёвую пазіцыю, – прэзентавала клуб “Нам гады не бяда” яго кіраўнік Галіна Касцюк.
Карыстаючыся выпадкам, яна ўручыла ўзнагароду Ядвізе Гушча, як аднаму з лепшых валанцёраў вобласці сярэбранага ўзросту.
У пацвярджэнне гучнай назвы свайго аб’яднання “Нам гады не бяда” маладыя пенсіянеры прадэманстравалі творчыя таленты ў канцэртнай праграме і нават запрасілі прафсаюзных лідараў на танцы. У падарунак ад прафсаюзаў яны атрымалі грашовы сертыфікат і бытавую тэхніку.
Вадзім Бялятка падзякаваў прафсаюзным лідарам і гасцям за тое, што наведалі Дзятлаўшчыну ў межах акцыі “Ад усёй душы”, шчыра павіншавалі дзятлаўчан са святамі, пакінулі тут часцінку сваёй цеплыні. Ён адзначыў, што клопат аб пажылых земляках – адна з важных сацыяльных задач, якую на працягу ўсяго года рэалізуюць у нашым раёне.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
