Васілій Іванавіч Пішчулін нарадзіўся ў 1918 годзе ў горадзе Сталіно РСФСР.
З 1939 года ў Чырвонай арміі. Удзельнік вызвалення Заходняй Беларусі ў 1939 годзе, савецка-фінскай вайны 1939-1940 гадоў, ваенны тэхнік.
У гады Вялікай Айчыннай вайны ён быў актыўным удзельнікам партызанскага руху на тэрыторыі Дзятлаўскага раёна. Апынуўшыся ў акружэнні, Васілій Іванавіч арганізаваў партызанскую групу. У чэрвені 1942 года прайшоў агульны сход некалькіх партызанскіх груп: Б.Булата, Ф.Камарова, П.Булака, В.Пішчуліна. Было вырашана аб’яднацца ў адзін атрад. У жніўні да атрада далучылася яшчэ некалькі груп, пасля было створана шэсць. Групай № 121, якая налічвала 70 чалавек, камандаваў Васілій Пішчулін. Быў створаны таксама штаб атрада, камандзірам якога выбралі Барыса Булата. Атраду далі назву 3649-ы. Народныя мсціўцы знішчалі малыя апорныя пункты акупантаў у сваёй зоне. Зброю партызаны дабывалі з месцаў былых баёў, рамантавалі і зноў пускалі ў справу. Васілій Пішчулін стаў «галоўнакамандуючым» бронетанкавымі сіламі. Баявы танкіст, майстар на ўсе рукі, ён разам з таварышамі праяўляў шмат выдумкі і таленту, каб аднавіць тэхніку, знайсці для яе гаручае.
У снежні 1942 года атрад 3649-ы разам з іншымі атрадамі ўвайшоў у Ленінскую партызанскую брыгаду.
У чэрвені 1943 года быў сфарміраваны атрад «Непераможны», камандзірам якога быў Пракоп Герасімчык, намеснікам камандзіра па разведцы Васілій Пішчулін.
За праяўленыя мужнасць і гераізм у гады вайны Васілій Іванавіч быў узнагароджаны медалем «Партызану Айчыннай вайны» І ступені.
Пасля вайны Васілій Пішчулін працаваў у Дзятлаўскім раёне. Памёр у 1981 годзе.
Матэрыял прадастаўлены Дзятлаўскім гісторыка-краязнаўчым музеем
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
