Пачасціліся звароты грамадзян Беларусі, якія самастойна выязджаюць працаваць за мяжу, з просьбай высветліць законнасць дзейнасці арганізацыі, якая аказвае ім паслугі па працаўладкаванні, а таксама разабрацца ў сітуацыі парушэння загадзя абмеркаваных з пасрэднікам або замежным наймальнікам умоваў працы.
Парушэнні тычацца парадку і тэрмінаў выплаты наймальнікамі заработнай платы, увядзення ў зман аб характары работы, умовах пражывання і харчавання, іншага.
Большасць грамадзян, якія знаходзяць работу за мяжой праз знаёмых, сяброў, сваякоў, інтэрнэт, не праверыўшы інфармацыю, не маюць легальнага статуса (дазволу на пражыванне і работу) у краіне і такім чынам жывуць і працуюць там незаконна. Пры парушэнні іх правоў яны поўнасцю безабаронныя і падвяргаюцца працоўнай эксплуатацыі.
Найбольш бяспечным спосабам выезду на работу за мяжу з’яўляецца выезд пры садзейнічанні ліцэнзіятаў – юрыдычных асобаў і індывідуальных прадпрымальнікаў, якія маюць спецыяльны дазвол (ліцэнзію), на права вядзення дзейнасці, звязанай з працаўладкаваннем за межамі Рэспублікі Беларусь.
Аднак памятайце, што ў гэтым выпадку перазаключаць за мяжой дагавор з іншаземным наймальнікам забаронена. Спіс ліцэнзіятаў размяшчаецца на сайце МУС Рэспублікі Беларусь www.mvd.gov.by (грамадзянства і міграцыя – працоўная міграцыя).
Каб не стаць “жывым таварам” трэба ведаць:
– пры заключэнні працоўнага дагавора ці кантракта ўважліва вывучыце і абмяркуйце яго ўмовы, якія тычацца характару, месца, аплаты работы, тэрміну дзеяння кантракта, краіны працаўладкавання, умоваў працы, правоў і абавязкаў бакоў, умоваў пражывання, харчавання, іншых сацыяльных гарантый, падставаў для скасавання кантракта і іншага;
– абавязкова трэба мець рабочую візу (турыстычная не дае права працаваць) дзяржавы працаўладкавання (у выпадку работы ў краіне з візавым рэжымам для Беларусі), выдадзеную яе дыпламатычным прадстаўніцтвам ці консульскай установай;
– з сабой неабходна мець копіі ўсіх дакументаў на выпадак страты арыгіналаў, страхоўку ад няшчасных выпадкаў і хваробы, пэўную суму грошай;
– калі ўмовы вашага знаходжання адрозніваюцца ад тых, што былі ў дагаворы, звяжыцеся з арганізацыяй, якая накіравала вас на работу. Патрабуйце неадкладнага паляпшэння ўмоваў. Калі сітуацыя не мяняецца, вы маеце права адмовіцца ад работы па дагаворы;
– перыядычна падтрымлівайце сувязь з роднымі і сябрамі, інфармуйце іх аб любых змяненнях умоваў вашага знаходжання;
– у выпадку крадзяжу дакументаў ці пры ўзнікненні праблем звяртайцеся ў пасольства ці консульства Рэспублікі Беларусь або ў паліцыю той краіны, дзе знаходзіцеся.
Працоўны дагавор павінен утрымліваць інфармацыю:
– аб тэрміне яго дзеяння, характары і месцы работы, умовах працы і яе аплаце, у тым ліку за работу ў начны, звышурочны час, выхадныя і святочныя дні;
– аб памеры прэмій, надбавак і ўтрыманняў заработнай платы;
– аб правах, абавязках, адказнасці бакоў, парадку і ўмовах скасавання ці падаўжэння працоўнага дагавора;
– аб арганізацыі пераезду, харчавання, пражывання, медыцынскага абслугоўвання;
– аб парадку аплаты шкоды, нанесенай здароўю работніка-эмігранта ў працэсе яго працоўнай дзейнасці і аб іншых сацыяльных гарантыях.
Ігар ХІТРО,
намеснік начальніка АУС Дзятлаўскага райвыканкама
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
