Заслужаныя ўзнагароды да прафесійнага свята

Напярэдадні Дня работнікаў сельскай гаспадаркі і перапрацоўчай прамысловасці аграпрамысловага комплексу, які будзем адзначаць 21 лістапада, урачыстыя мерапрыемствы прайшлі ў працоўных калектывах раёна.

Старшыня раённага выканаўчага камітэта Андрэй Садоўскі пабываў у Міроўшчыне і павіншаваў работнікаў ААТ “Дзятлаўская сельгастэхніка”.

– Сёлета Дзятлаўшчына дасягнула добрых вынікаў у плане сацыяльна-эканамічнага развіцця, а некаторыя паказчыкі вышэйшыя за сярэднеабласныя, – адзначыў Андрэй Уладзіміравіч. – Гэта заслуга ўсіх калектываў, у тым ліку Дзятлаўскай сельгастэхнікі, бо ваша прадпрыемства працуе паспяхова. Прыбытак арганізацыі за 9 месяцаў склаў 2 мільёны 184 рублі, што ў два разы перавысіла мінулагодні паказчык. Дзятлаўскай сельгастэхнікай у свой час быў узяты правільны кірунак у рабоце па выпуску даільных залаў. Жадаю, каб і надалей вы развіваліся, плённа працавалі, каб выпушчаная прадукцыя была запатрабаванай, здароўя вам, ладу ў сем’ях, дабрабыту.

Прыемным момантам візіту кіраўніка раёна стала ўручэнне работнікам заслужаных узнагародаў. Ганаровай граматай раённага выканаўчага камітэта адзначана намесніца галоўнага бухгалтара Наталля Клімовіч, Падзячнымі пісьмамі райвыканкама – слесар Сяргей Васько і электраманцёр Валерый Шарстабітаў. Падзяку раённага камітэта прафсаюза работнікаў аграпрамысловага комплексу атрымаў слесар Аляксандр Емельянчык.

У гэты ж дзень са святочным візітам усе сельскагаспадарчыя і перапрацоўчыя прадпрыемствы раёна аграпрамысловага комплексу наведалі прадстаўнікі мясцовай улады: першы намеснік старшыні райвыканкама начальнік упраўлення сельскай гасападаркі і харчавання Віталій Шулейка, старшыня раённага Савета дэпутатаў Аляксандр Бараноўскі, намеснікі старшыні райвыканкама Андрэй Жыдко і Ігар Кухарэвіч, кіраўнік спраў райвыканкама Аляксандр Андруцэвіч, старшыня райкама прафсаюза работнікаў аграпрамысловага комплексу Уладзімір Казак, першы сакратар раённага камітэта ГА “БРСМ” Кацярына Хілімончык, старшыня раённага аб’яднання прафсаюзаў Валерый Макарчык.

Яны павіншавалі калектывы прадпрыемстваў з прафесійным святам, пажадалі ім плённай працы на карысць Радзімы, далейшых поспехаў ва ўсіх пачынаннях, далейшай перспектывы, дабрабыту і ладу ў сем’ях.

Ва ўрачыстай абстаноўцы былі ўручаны заслужаныя ўзнагароды: граматы, падзячныя лісты, дыпломы, грашовыя прэміі ад райвыканкама і прафсаюзных арганізацый.