8 Сакавіка – гэта не толькі свята жанчын, вясны і квецені. Напярэдадні гэтай даты мужчыны дружна ламаюць галаву над тым, як лепш павіншаваць сваіх любімых і калегаў па працы, а магазіны наперабой прапаноўваюць арыгінальныя падарункі. Кветкі ці шакалад, духі ці айфон, або простае-найдаражэйшае “Я цябе кахаю” – пацікавімся, якія падарункі дзятлаўскія рыцары лічаць самымі важнымі.
АЛЯКСАНДР КАМАРОЎ, намеснік начальніка аддзела ідэалагічнай работы, культуры і па справах моладзі Дзятлаўскага райвыканкама:
— Лепшы падарунак – увага, дабрыня і любоў блізкіх. Калі жанчыну любяць, яна прыгажэе, з’яўляецца бляск у вачах, калі жанчына акружана мужчынскай увагай, яна сама пачынае квітнець, як першацвет, асабліва ў сакавіцкія дні. А кветкі і падарункі – гэта толькі дадатак да пералічана вышэй. Усім жанчынам зычу здароўя, кахання, сямейнага шчасця і дабрабыту.
ЮРЫЙ БОРТНІК, першы намеснік начальніка ўпраўлення сельскай гаспадаркі Дзятлаўскага раёна:
— Па-мойму, лепшым падарункам для жанчын ва ўсе часы з’яўляюцца кветкі. У жаночае свята – гэта цюльпаны, першыя, свежыя і радасныя вясновыя сімвалы. Падарункі павінны прыносіць радасць, а я ведаю, што мая жонка вельмі любіць кветкі. Таму абавязкова стараюся з нагоды свята падарыць ёй вясновы букет. Усім дзятлаўчанкам жадаю прыгажосці, вясновага настрою, радасці і ўдачы.
УЛАДЗІМІР КАЗАК, старшыня Дзятлаўскага раённага камітэта прафсаюза работнікаў аграпрамысловага комплексу:
— Вядома, самы важны падарунак для кожнай жанчыны – гэта ўвага мужчыны. У сённяшні час вечнай мітусні і занятасці нашы жанчыны чакаюць ад нас увагі, надзейнасці, падтрымкі. І, вядома, трэба не пераставаць здзіўляць сваіх любімых, рабіць прыемныя сюрпрызы, у тым ліку, з нагоды свята. Дарагія жанчыны, няхай вас заўжды акружаюць самыя лепшыя, самыя дастойныя мужчыны. Будзьце здаровыя і шчаслівыя!
ВАЛЯНЦІН ПАЛУХІН, педагог музыкі сярэдняй школы №3 горада Дзятлава:
— Не адступаючы ад мудрых традыцый, прыдуманых не намі, лічу лепшым вясновым падарункам кветкі. У нашай сям’і гэта амаль заўжды ружы. Не стараюся дарыць песенных падарункаў, бо ў мяне і ў жонкі праца звязана з музыкай. Яшчэ адзін важны падарунак (і не толькі ў свята) – дапамагчы сваёй палавінцы, даць магчымасць адпачыць ад хатніх клопатаў. Усім цудоўным прадстаўніцам чалавецтва жадаю вясны ў душы і нязгаснай маладосці.
Гутарыла Н. АВЯРЧУК
Фота аўтара