У другі дзень штогадовага раённага агляду-конкурсу пасеваў сельскагаспадарчых культур спецыялісты на чале з начальнікам упраўлення сельскай гаспадаркі і харчавання Віталіем Шулейкам аб’ехалі палеткі яшчэ чатырох “канкурсантаў” і падвялі канчатковыя вынікі.
На гэты раз справаздачу трымалі агранамічныя службы ТАА “РоданАгра”, КСУП “Войневічы”, ААТ “Дварэц-Агра”, ААТ “Граніт-Агра”.
Абмен вопытам і ведамі прадоўжыўся. Спецыялісты расказвалі, якую тактыку выкарыстоўваюць пры падкормцы і апрацоўцы розных культур, якія з іх з’яўляюцца адна для адной лепшымі папярэднікамі, якія хімпрэпараты, сарты і гібрыды найбольш сябе зарэкамендавалі, як з дапамогай агранамічнага вопыту і ведаў можна “адкарэктаваць” свавольствы прыродных стыхій – спёкі, зацяжных дажджоў, замаразкаў. Не абышлося і без ноткі азарту: параўноўвалі, у каго даўжэйшы лён і больш важкі цукровы бурак, вышэйшыя кукуруза і рапс.
У час аб’езду да спецыялістаў агранамічнай службы раёна звярнуўся начальнік Дзятлаўскай раённай інспекцыі прыродных рэсурсаў і аховы навакольнага асяроддзя Дзмітрый Балькоўскі. Ён заклікаў аграномаў гаспадарак не дапускаць вырастання на прылеглых да сельгасугоддзяў тэрыторыях інвазіўных відаў раслін і своечасова праводзіць не толькі хімпраполку на палях, але і барацьбу з залатарнікам і баршчавіком.
Нарэшце прыспеў час узнагароджвання лідараў намінацый і “агульнага заліку” дыпломамі і грашовымі прэміямі. Іх уручыў Віталій Шулейка.
Дыплом за лепшыя пасевы рапсу атрымаў сельскагаспадарчы філіял “АграМілк”.
Пераможцам па лёне стала ААТ “Дварэц-Агра”.
Яравыя зерневыя і зернебабовыя вышэйшым балам адзначаны ў ААТ “Граніт-Агра”.
Дыплом за лепшыя пасевы цукровых буракоў – у КСУП “Войневічы”.
Лідарам намінацый па кукурузе і бульбе стала КСУП “Хвінявічы”.
Агульныя месцы ацэньваліся па суме паказчыкаў: па падрыхтоўцы да семінара, добраўпарадкаванні, культуры земляробства, адсутнасці інвазіўных раслін, іншых. Бясспрэчным лідарам раённага конкурсу стала КСУП “Хвінявічы”, якому дасталіся дыплом І ступені і адпаведная грашовая ўзнагарода, на другой пазіцыі – сельскагаспадарчы філіял “АграМілк”, на трэцяй – КСУП “Войневічы”.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
