23 лютага на Дзятлаўшчыне адзначылі Дзень абаронцаў Айчыны і Узброеных Сіл Рэспублікі Беларусь.
Ва ўрачыстых мерапрыемствах прынялі ўдзел кіраўніцтва раёна на чале са старшынёй райвыканкама Андрэем Садоўскім, прадстаўнікі грамадскіх арганізацый і аб’яднанняў, сілавых структур, працоўных калектываў горада Дзятлава. У знак памяці, пашаны да гераічнага мінулага роднай зямлі і ўсіх загінулых у Вялікай Айчыннай вайне яны ўсклалі кветкі і вянкі да мемарыяла Героям Савецкага Саюза Яну Фогелю і Паўлу Пятрову і брацкай магілы загінулых воінаў.
Свята прадоўжылася канцэртнай праграмай у Цэнтры культуры і народнай творчасці горада Дзятлава з удзелам творчых калектываў і артыстаў раёна.
Гасцей канцэрта павіншаваў ваенны камісар Дзятлаўскага раёна падпалкоўнік Генадзь Суравец:
– У гэты святочны дзень мы ўшаноўваем абаронцаў Радзімы, удзельнікаў Вялікай Айчыннай вайны, ветэранаў ваеннай службы, тых, хто прайшоў дарогамі Афганістана, хто сёння ў радах Узброеных Сіл Беларусі выконвае свой воінскі абавязак. У нашай краіне дзесяцігоддзямі гэта свята адзначаецца як усенароднае, – нагадаў ён. – Абарона Айчыны заўжды была справай доблесці і гераізму, так было, ёсць і будзе. Усе задачы, пастаўленыя кіраўніцтвам краіны перад беларускімі вайскоўцамі, будуць выкананы ў поўнай меры.
Музычнымі падарункамі гледачоў парадавалі дзіцячы танцавальны калектыў “Сунічкі”, народны ансамбль “Зараначка”, група “Бархат”, ВІА “Гарачыя сэрцы”, а таксама сольныя выканаўцы.
З раённай сцэны гучалі віншаванні для сапраўдных мужчын, пажаданні мірнага неба, бадзёрасці духу, моцнага здароўя і ўдачы ва ўсіх справах.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
