Дэлегацыя Дзятлаўскага раёна наведала Мінск, дзе прыняла ўдзел у рэспубліканскім патрыятычным форуме “Мы – беларусы!”, прысвечаным Дню народнага адзінства.
Дзятлаўчане падзяліліся сваімі ўражаннямі ад мерапрыемства і выступлення на ім Прэзідэнта Рэспублікі Беларусь Аляксандра Лукашэнкі.
Святлана Залучан, старшыня раённага камітэта Беларускага прафсаюза работнікаў дзяржаўных і іншых установаў:
– Дзень народнага адзінства – маладое свята, якое сімвалізуе яднанне беларускай нацыі, падзяліць якую спрабавалі на працягу ўсёй нашай гісторыі. І калі раней па розных прычынах гэта атрымлівалася, то падзеі сучаснасці прадэманстравалі, што ў ХХІ стагоддзі раз’яднаць, пасварыць беларускі народ немагчыма.
Сёлета цэнтральнай падзеяй Дня народнага адзінства стаў патрыятычны форум “Мы – беларусы!”, які адбыўся на пляцоўцы “Мінск-Арэны”, у ім мне пашчасціла прыняць удзел. На мерапрыемства прыбылі дэлегацыі ад усіх абласцей і Мінска, у іх ліку моладзь, спартсмены, палітычныя партыі, СМІ. На форуме таксама прысутнічалі кіраўнікі дзяржаўных органаў, міжнародных арганізацый, дыпламатычных прадстаўніцтваў.
Уважліва слухала выступленне Прэзідэнта Беларусі, згодна з яго словамі, што адзінства – галоўная ўмова захавання дзяржавы, выжывання як нацыі. Для мяне 17 верасня – гэта падзея, якая сімвалізуе гістарычную справядлівасць, што вярнулася на нашу зямлю.
Для нас сёння, як ніколі, важна быць адзінымі, згуртаванымі, разумець неабходнасць суверэнітэту дзяржавы, а ў яго аснове ляжыць у першую чаргу эканамічны складнік. Таму нам трэба плённа працаваць, кожнаму займацца сваёй справай. Толькі на такім падмурку можна будаваць незалежную дзяржаву.
Ёсць святыя сімвалы, якія ніколі не страцяць сваёй значнасці: радзіма, сям’я, сяброўства. Я б яшчэ дадала – школа, праца, землякі. І, вядома, гэта законы краіны, у першую чаргу Канстытуцыя – той базіс, які забяспечвае жыццяздольнасць грамадства і дзяржавы. Лічу, што цяпер вельмі важна ўмацоўваць сямейныя каштоўнасці, берагчы традыцыі сям’і, не паддавацца дэструкцыйным плыням псеўдадэмакратычных тэхнолагаў.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
