Вера Калпінская: “Жыццё падаўжалі праца і клопат блізкіх”

Праект “Глыбінкай жыве Беларусь” прадаўжае знаёміць нас з цікавымі людзьмі Дзятлаўшчыны.

Па сакрэты даўгалецця работнікі сектара пазастацыянарнага абслугоўвання насельніцтва раённага цэнтра культуры і народнай творчасці накіраваліся да дзятлаўчанкі Веры Калпінскай, якая сёлета адзначыла свой юбілейны 90-ы дзень нараджэння.

З “круглай” датай Веру Андрэеўну павіншавалі таксама актывісты раённага савета ветэранаў, раённых арганізацый ГА “БРСМ” і Таварыства Чырвонага Крыжа, родныя, сябры. Імянінніцы зычылі моцнага здароўя, душэўнай цеплыні, клопату блізкіх людзей. Не абышлося без кветак і падарункаў, у тым ліку музычных.

Са сваімі гасцямі Вера Андрэеўна з задавальненнем падзялілася аноўнымі фактамі біяграфіі і ўласнымі сакрэтамі даўгалецця.

Нарадзілася яна на Піншчыне, у вёсцы Выжлавічы ў вялікай сялянскай сям’і, мела тры сястры і брата.

З асаблівай горыччу юбілярка ўспамінае часы Вялікай Айчыннай вайны, калі тэрыторыя Беларусі аказалася пад нямецка-фашысцкімі акупантамі. Пацярпелі ад зверстваў ворагаў і родныя Выжлавічы. Неяк прапаў нямецкі афіцэр, і захопнікі аб’явілі, што, калі яго не знойдуць, расправяцца з жыхарамі вёскі, а калі змогуць адшукаць – памілуюць іх. Афіцэра знайшлі, а вось фашысцкае “памілаванне” аказалася пустымі словамі. У хуткім часе мясцовых жыхароў пачалі вывозіць у Германію, трапіла туды і Вера, якая цяпер лічыцца малалетнім вязнем вайны. Узгадваць той час Вера Андрэеўна не любіць, называе яго “страшным і бесчалавечным”.

Адукацыя Веры Калпінскай – сем гадоў школы (апошнія чатыры класы заканчвала ў Пінску, дзе жыла сястра) і Пінскі фінансавы тэхнікум. Па размеркаванні выпускніца трапіла на працу ў дзятлаўскі банк. Дзятлаўшчыну, дзе прайшла большая палова жыцця, Вера Андрэеўна лічыць сваёй другой радзімай. Тут яна пазнаёмілася з мужам, нарадзіла траіх дзяцей, дачакалася сямі ўнукаў і трох праўнукаў.

Апошнія 22 гады перад выхадам на пенсію наша зямлячка працавала ў раённым аддзеле статыстыкі галоўным эканамістам.

На заслужаным адпачынку Вера Калпінская таксама не сядзела без справы: трымала свіней і хатнюю птушку, садзіла агарод. Дарэчы, даглядаць градкі і клумбы юбілярка любіць і цяпер, а яшчэ яна з задавальненнем глядзіць па тэлевізары навіны і пазнавальныя перадачы, любіць старыя песні, асабліва адну – з кінастужкі “Вясна на Зарэчнай вуліцы”.

Сакрэтамі свайго даўгалецця Вера Андрэеўна лічыць любоў да працы, клопат блізкіх, рух і ўраўнаважаны характар.

З пазіцыі жыццёвага вопыту маладому пакаленню Вера Калпінская раіць не наракаць на жыццё, а старанна працаваць, берагчы сваю краіну і нашага Прэзідэнта.