На Дзятлаўшчыне завяршаецца добраахвотная рэспубліканская акцыя “Тыдзень лесу-2021”, якая стала самай масавай з моманту заснавання.
Сёння да яе далучыліся супрацоўнікі райвыканкама і дзяржаўных службаў раёна.
У лясным масіве побач з вёскай Селівонкі было высаджана каля сямі тысяч саджанцаў бярозы, якія работнікі лясгаса нарыхтавалі ў мясцовых лясах.
– Думаю, невыпадкова, што ў Год народнага адзінства да акцыі “Тыдзень лесу” далучылася так многа жадаючых. Гэта практычна ўсе дзяржаўныя і прыватныя арганізацыі раёна. Асабліва актыўна мерапрыемствы па пасадцы лесу падтрымалі калектывы навучальных установаў, – расказаў дырэктар Дзятлаўскага лясгаса Сяргей Дурко.
Старшыня райвыканкама Андрэй Садоўскі, які разам са сваімі калегамі кожны год удзельнічае ў “Тыдні лесу”, падкрэсліў значэнне акцыі для раёна і яго жыхароў:
– Пасадка лесу – гэта ўклад у экалагічны і эканамічны дабрабыт нашага раёна: багатыя краявіды, чыстае паветра, нарэшце, драўніна. Для саміх грамадзян акцыя “Тыдзень лесу” – яшчэ адзін урок беражлівасці: чалавек, які сам пасадзіў дрэвы, будзе ашчадна ставіцца да прыродных рэсурсаў.
У мінулым годзе на Дзятлаўшчыне высадзілі лясныя культуры на плошчы трыста гектараў, 10 % з іх – у межах акцыі “Тыдзень лесу”, сёлета ў планах пасадка чатырохсот гектараў лесу, пятую частку з іх – на працягу рэспубліканскай акцыі.
Наталля АВЯРЧУК
