Грып – вострая вірусная інфекцыя, якая не мае сабе роўных па хуткасці глабальнага распаўсюджвання, прыводзячы да эпідэмій і пандэмій. Вірусы грыпу цыркулююць ва ўсім свеце, на грып можа захварэць любы чалавек незалежна ад полу, узросту і расы.
Сезонны і пандэмічны грып небяспечны для ўсіх, але максімальнай рызыцы развіцця неспрыяльных наступстваў падвяргаюцца цяжарныя жанчыны, дзеці ва ўзросце ад 6 месяцаў да 3-х гадоў, людзі, старэйшыя за 65 гадоў, пацыенты з хранічнымі захворваннямі, а таксама медыцынскія работнікі.
Захворванне распаўсюджваецца паветрана-кропельным шляхам, вірусныя часціцы па паветры перадаюцца ад заражанага чалавека да здаровага ў час размовы, кашлю і чхання, што асабліва небяспечна пры знаходжанні ў адным памяшканні з захварэлым (кабінет, грамадскі транспарт, месцы з вялікай колькасцю людзей). Таксама вірус лёгка распаўсюджваецца праз рукі і інфіцыраваныя паверхні.
Устойлівасць віруса грыпу ў знешнім асяроддзі невялікая. Колькі часу жыве вірус грыпу па-за арганізмам чалавека, залежыць ад тэмпературы навакольнага асяроддзя: чым яна вышэйшая, тым меншы тэрмін існавання віруса, пры пакаёвай тэмпературы вірус выжывае некалькі гадзін.
Грып пачынаецца раптоўна і доўжыцца каля тыдня. Асноўныя сімптомы – павышэнне тэмпературы цела да 38-40 градусаў, агульная слабасць, павышаная патлівасць, галаўны боль, болі ў мышцах і суставах, сухі кашаль, заложанасць носа, слабы голас.
Вакцынацыя – гэта адзіны спецыфічны і таму самы эфектыўны шлях прафілактыкі грыпу і яго ўскладненняў.
Сучасныя вакцыны супраць грыпу добра пераносяцца як дзецьмі, так і дарослымі і спрыяюць фарміраванню спецыфічнага імунітэту ўжо праз 7-14 дзён пасля вакцынацыі, дзеянне чаго захоўваецца да 6-12 месяцаў.
Правядзенне прафілактычных прышчэпак у нашай краіне магчыма толькі пасля медыцынскага агляду і дазволу. Чалавеку ў стане абвастрэння хранічнага захворвання прапануюць дачакацца нармалізацыі стану і затым правесці вакцынацыю.
У 2018 годзе для вакцынацыі супраць грыпу ў Дзятлаўскім раёне выкарыстоўваецца вакцына «Грыпол плюс» расійскай вытворчасці.
Зрабіўшы прышчэпку ад грыпу, вы абараняеце свой арганізм ад атакі вірусаў грыпу.
Таццяна КАСІЛА,
памочнік доктара-эпідэміёлага Дзятлаўскага райЦГЭ
