Дзятлаўскі раённы цэнтр гігіены і эпідэміялогіі сумесна з цэнтральнай раённай бальніцай правёў інфармацыйна-адукацыйную акцыю па прафілактыцы хваробаў сістэмы кровазвароту “Лічбы здароўя: артэрыяльны ціск” пад дэвізам “Кантралюем ціск – падаўжаем жыццё!”.
Мерапрыемства разгарнулася ў холе Дзятлаўскай цэнтральнай раённай аптэкі №55. Усім жадаючым спецыялісты бальніцы вымяралі артэрыяльны ціск; кансультавалі, як правільна яго вымяраць самастойна; расказвалі пра прафілактыку сардэчна-сасудзістых захворванняў; адказвалі на пытанні. Некаторым удзельнікам акцыі, у каго артэрыяльны ціск быў павышаны (іх было чатыры чалавекі), тут жа выдаваліся талоны на прыём да доктара-тэрапеўта райпаліклінікі.
Валеолаг цэнтра гігіены і эпідэміялогіі дапамагала ўдзельнікам акцыі даведацца свой індэкс масы цела, таксама тлумачыла, чым небяспечныя высокі і нізкі індэксы, матывавала наведвальнікаў аптэкі да захавання прынцыпаў здаровага ладу жыцця і клопату пра ўласнае здароўе.
Як адзначылі арганізатары акцыі, такія мерапрыемствы будуць праводзіцца кожную другую сераду месяца. Ахоплены будзе ўвесь раён. Кропкі іх правядзення ўжо вызначаны.
