З 27 ліпеня па 2 жніўня 2020 года ў аператыўна-дзяжурную службу АУС Дзятлаўскага райвыканкама паступілі 65 паведамленняў, 9 з якіх утрымлівалі звесткі аб прыкметах учыненых злачынстваў, 21 – аб адміністрацыйных правапарушэннях, 35 – аб іншых здарэннях.
Да адміністрацыйнай адказнасці былі прыцягнуты 28 правапарушальнікаў, узбуджаны дзве крымінальныя справы.
Пагаспадарылі злодзеі
Раённы аддзел Следчага камітэта ўзбудзіў крымінальную справу па факце крадзяжу ў вёсцы Засецце. З дома мясцовай жыхаркі прапалі спартыўная сумка, асабістыя рэчы, 20 метраў электраправодкі, бытавая хімія, прас, інструменты. З незамкнёных гаспадарчых пабудоваў злодзеі вынеслі тры ручныя касы і саломарэзку. Урон ад крадзяжу ацэнены ў 252 беларускія рублі.
Міліцыя просіць грамадзян, якім што-небудзь вядома пра ўчынены нераскрыты крадзеж, паведаміць па нумары 102. Ананімнасць гарантавана.
Здарэнні ў сельгаспрадпрыемствах
На тэрыторыі мехмайстэрняў адной з гаспадарак Дзятлаўскага раёна выяўлены факты парушэння парадку ўліку і захоўвання лому чорных металаў. Адміністрацыйныя пратаколы складзены на дзвюх адказных асобаў гэтага сельгаспрадпрыемства.
Да адміністрацыйнай адказнасці за знаходжанне ў стане алкагольнага ап’янення на працоўным месцы прыцягнуты чатыры работнікі розных сельгаспрадпрыемстваў Дзятлаўшчыны.
Вырасла кветка – сапсавала настрой
На прысядзібным участку жыхаркі аднаго з аграгарадкоў раёна праваахоўнікі знайшлі забароненую да вырошчвання наркаўтрымліваючую расліну – алейны мак. Ён рос на плошчы 0,003 гектара. На гаспадыню складзены адміністрацыйны пратакол, расліны вырваны і знішчаны.
Міліцыя нагадвае жыхарам раёна, што за вырошчванне маку і канопляў на ўчастках законам прадугледжана адказнасць. На Дзятлаўшчыне прадаўжаюцца прафілактычныя мерапрыемствы ў
рамках спецыяльнай праграмы “Мак”: міліцыя і надалей будзе праводзіць агляд прысядзібных участкаў.
Ігар ХІТРО,
Намеснік начальніка АУС Дзятлаўскага райвыканкама
Подписывайтесь на телеграм-канал «Гродно Медиа Group» по короткой ссылке @GrodnoMediaGroup
