Сёння 13 лютага 2018 года пачалося датэрміновае галасаванне на выбарах дэпутатаў у мясцовыя Саветы 28-га склікання.
Карэспандэнтка газеты “Перамога” наведалася на Дварэцкі ўчастак для галасавання №8, дарэчы самы вялікі ў сельскай мясцовасці Дзятлаўскага раёна, дзе чакаюць галасаваць 878 выбаршчыкаў, і даведалася, ці актыўна мясцовыя жыхары прымаюць удзел у датэрміновым галасаванні.
У першы дзень датэрміновага галасавання, незадоўга да яго пачатку, як і належыць тут апячаталі скрыню для галасавання і наклеілі на яе аркуш паперы з подпісамі членаў участковай камісіі (частка 3 артыкула 51 Выбарчага кодэкса РБ).
На гадзінніку без некалькіх хвілін 10 гадзін, а ў школьным фае, дзе знаходзіцца ўчастковая выбарчая камісія, з’яўляецца першы выбаршчык – воін-афганец Юрый Яфімаў. Яго просяць дачакацца вызначанага часу.
Нарэшце першы бюлетэнь апушчаны ў урну.
Пытаюся, “чаму галасуеце датэрмінова і ці актыўны вы выбаршчык?”
– Прагаласаваць датэрмінова мяне “паклікаў” абавязак грамадзяніна і воіна-афганца.
Я заўсёды прымаю ўдзел у выбарах, бо як ужо зазначыў, лічу гэта абавязкам кожнага з нас. Мы павінны выбраць людзей, якія будуць рабіць нашу краіну лепшай, будуць клапаціцца пра наша з вамі далейшае жыццё. Заклікаю, каб на выбары прыходзілі ўсе і скарысталіся сваім выбарчым правам: прагаласавалі за дастойных кандыдатаў.
З лёгкай рукі Юрыя Яфімава на Дварэцкім ўчастаку для галасавання №8 пачынаецца актыўнае галасаванне. З моманту адкрыцця прыходзяць каля двух дзясяткаў чалавек.
Дарэчы, прагаласаваць датэрмінова можна па 17 лютага ўключна з 10 да 14 гадзін і з 16 да 19 гадзін. Такое права прадастаўлена выбаршчыкам, якія ў дзень выбараў не будуць знаходзіцца па месцы свайго жыхарства. Пры гэтым афіцыйнага пацвярджэння прычынаў немагчымасці прыйсці на ўчастак для галасавання ў дзень выбараў не патрабуецца.
Ірына СТЫРНІК