Зіма, лёд, рыбалка сырзавода
Рыбкі падлавілі. Пара і юшку мастачыць. За сякеру ўзяўся юшкавар. А неўзабаве як начараваў хто: калі з берагу салодкім дымком пацягнула, у носе дражліва заказытала, тут і клёў пачаў даваць перабоі. Адна, другая, трэцяя лунка асірацела. Ох і смачна пахне юшка ўзімку на возеры! Глядзі, і асістэнтаў у юшкавара прыбывае. Раць!
Але прафсаюзны лідар рашуча скіраваў стыхію ў конкурснае русла. Загадаў анекдоты травіць. Гэта калі ласка! І пра рыбу, і, вядома, пра русалак. Да анекдотаў юшка паспела. Самы раз. Юшка, скажу вам, вышэйшы клас! Пад юшку анекдотчыкаў не суняць.
І раптам!.. Сцяжок! Сцяжок! Спрацоўка! Чый сцяжок?.. Ногі ў рукі і на лёд. О-го-го… Ёсць шчупак! Ды пад жартачкі.
І яшчэ больш захарашэла ад рыбалкі…