Значнай падзеяй у парафіяльным жыцці прыходу касцёла Унебаўзяцця Найсвяцейшай Панны Марыі ў Дзятлаве стаў прыезд Біскупа Гродзенскай дыяцэзіі Аляксандра Кашкевіча.
Сустрэча з ім распачалася з урачыстай працэсіі, якой вернікі прайшлі да касцёла, дзе Біскуп Аляксандр узначаліў Святую Імшу. У супольнай малітве разам з прыхаджанамі касцёла Ксёндз-біскуп папрасіў заступніцтва і апекі Найсвяцейшай Панны, яе дапамогі на шляху да сапраўднай Хрыстовай веры.
Гэтаму садзейнічаў і сакрамент бежмавання, які праз нанясенне святым алеем знаку крыжа Ксёндз-біскуп удзяліў прыхаджанам касцёла, як сімвал далейшага іх больш поўнага ўдзелу ў Хрыстовай таямніцы збаўлення, у спасланні Духа Святога. Такім чынам, праз сакрамент бежмавання вернікі становяцца сапраўднымі сведкамі Хрыста. У пацвярджэнне гэтага яны абавязаны несці свет веры і свой крыж годна і з цярплівасцю — як вучыць гэтаму Збаўца.
А. ДУБРОЎСКАЯ
Фота аўтара