У гурткоўцаў “Кібертэрыторыі” два абласныя дыпломы

У Лідскім раённым цэнтры творчасці дзяцей і моладзі прайшоў абласны турнір, прысвечаны Міжнароднаму дню робататэхнікі і Дню беларускай навукі.

Каля васьмідзесяці навучэнцаў з дзесяці раёнаў Прынёмання ў час іспытаў атрымалі каштоўны вопыт праграмавання робатаў і кіравання сцэнарыямі робататэхнікі.

Адметна, што свята ўжо на працягу некалькіх гадоў збірае на адной пляцоўцы не толькі прафесіяналаў галіны, але і юных вынаходнікаў інжынернай будучыні і даследчыкаў. Турнір спрыяе выяўленню і развіццю ў школьнікаў творчых здольнасцяў, якія дапамагаюць ім далучыцца да сферы тэхналогій і інжынерыі.

Наш раён на турніры прадстаўлялі навучэнцы гуртка “Кібертэрыторыя” Дзятлаўскага раённага цэнтра творчасці дзяцей і моладзі і іх педагог Віталій Халюкоў.

Юныя дзятлаўскія робататэхнікі заявіліся ў намінацыі “Следаванне па лініі”. У сур’ёзнай барацьбе нашым землякам удалося стаць прызёрамі абласнога турніру.

Дыпломам за другое месца адзначаны Мацвей Сямашка і Аляксандр Кучынскі. Уладальнікамі дыплома трэцяй ступені сталі Аляксандр Жукоўскі і Мацвей Маркевіч.

Варта адзначыць, што гурткоўцы “Кібертэрыторыі” і іх педагог Віталій Халюкоў ужо другі год запар трымаюць высокую планку і ва ўмовах сур’ёзнай канкурэнцыі займаюць лідарскія пазіцыі ў абласных выпрабаваннях. Летась у намінацыі “Следаванне па лініі: юніёры, адукацыйныя канструктары” навучэнцы Ілья Бекман і Аляксандр Жукоўскі былі пераможцамі і ўладальнікамі дыплома першай ступені.

Ірына СТЫРНІК

Фотаздымкі прадастаўлены ўдзельнікамі

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашалепшае #нашелучшее