“Пакаленні разам!”

Пад такой назвай на Дзятлаўшчыне прайшоў моладзевы брыфінг для членаў гарадскога піянерскага штаба раённага савета ГА “БРПА” і дэпутатаў моладзевага парламента пры раённым Савеце дэпутатаў.

Прыняць у ім удзел актывістаў моладзевага руху запрасіла старшыня раённага савета ГА “БРПА”, каардынатар дзейнасці моладзевага парламента Ірына Мішчанка. Не абышлося і без гасцей. “Дыялог пакаленняў” са школьнікамі ладзілі ветэран камсамольскага руху Дзятлаўшчыны Надзея Канявега і першы сакратар раённага камітэта ГА “БРСМ” Кацярына Хілімончык.

Сярод іншых пытанняў падвялі вынікі тэматычнай раённай чатырохдзёнкі “БРПА”­_“БРСМ” з паклонам і любоўю”, прымеркаванай да завяршэння рэспубліканскай дабрачыннай акцыі “Ад усёй душы”.

– Аказанне дапамогі і падтрымкі, павага да прадстаўнікоў старэйшага пакалення – адзін з прыярытэтных кірункаў моладзевай палітыкі ў нашай дзяржаве, – акцэнтавала ўвагу прысутных Ірына Мішчанка. – У сваю чаргу людзям мудрага ўзросту ёсць што сказаць моладзі. Пераемнасць пакаленняў, духоўныя каштоўнасці – тая надзейная аснова, на якой будуецца моцная незалежная Беларусь. Піянеры і члены моладзевага парламента – актыўныя цімураўцы і валанцёры, таму яны не абышлі ўвагай і дабрачынную акцыю для пажылых людзей “Ад усёй душы”.

Пацвярджэннем словаў піянерскага лідара стаў відэаролік з віншаваннямі ад ГА “БРСМ” і “БРПА” для ветэранаў моладзевага руху Дзятлаўшчыны.

За актыўную жыццёвую пазіцыю школьнікам падзякавала Надзея Канявега. Яна расказала дзецям, у якіх карысных справах удзельнічалі піянеры і камсамольцы яе пакалення.

– Беларускі рэспубліканскі саюз моладзі, як пераемнік камсамола, аб’ядноўвае яркіх і цікавых асобаў з актыўнай жыццёвай пазіцыяй, – далучылася да дыялога Кацярына Хілімончык. – Розніца ў тым, што мы жывём у больш мабільны час. Аднак галоўная каштоўнасць і раней, і сёння – гэта людзі. Моладзевая арганізацыя ўвасабляе ў жыццё сотні смелых ідэй і канкрэтных справаў, рэалізуе маштабныя праекты па грамадзянска-патрыятычным, працоўным выхаванні, прапагандзе здаровага ладу жыцця і, вядома ж, падтрымцы пажылых людзей.

Пасля размовы моладзь падзялілася на каманды і прыняла ўдзел у конкурсах і трэнінгу: разам спявалі песні, адгадвалі рэбусы, будавалі планы на 2024 год.

Ірына СТЫРНІК
Фотаздымкі прадастаўлены Ірынай МІШЧАНКА