У Беларусі напярэдадні Дня Перамогі савецкага народа ў Вялікай Айчыннай вайне стартавала віншавальная эстафета з выплатай матэрыяльнай дапамогі асобным катэгорыям грамадзян паводле пастановы Савета Міністраў Рэспублікі Беларусь № 113.
5 мая да перадсвяточнай акцыі далучылася Дзятлаўшчына. На адрасы землякоў з ліку былых работнікаў тылу, вязняў фашысцкіх канцлагераў, сем’яў загінулых накіраваліся прадстаўнікі ўлады, Дзятлаўскага ўчастка паштовай сувязі, работнікі культуры, сельскіх выканаўчых камітэтаў, школьнікі, члены калектываў, дзе раней працавалі гэтыя людзі.
У вёсцы Пруд удзельнікі акцыі, да якіх далучыліся работнікі КСУП “Войневічы” і старшыня мясцовага сельвыканкама Вольга Мазоль, з выплатай і падарункамі наведалі Сяргея Яфіміка – члена сям’і загінулых у ваенны час.
– З надыходзячым Днём Перамогі вас, – павіншаваў Сяргея Іосіфавіча намеснік старшыні райвыканкама Вадзім Бялятка. – Моцнага здароўя, доўгіх гадоў жыцця, дабрабыту і ўсяго найлепшага.
Навучэнцы Казлоўшчынскай сярэдняй школы падзякавалі Сяргею Яфіміку, як прадстаўніку ваеннага пакалення, за мір, жыццё, спакойныя сны, магчымасць вучыцца і ажыццяўляць свае мары. Яны паабяцалі не забываць подзвігі абаронцаў Айчыны, з пашанай і павагай адносіцца да іншых людзей, жыцці якіх апаліла Вялікая Айчынная вайна.
Звонкай песняй “Кацюша” Сяргея Іосіфавіча павіншавалі артысты сектара нестацыянарнага абслугоўвання насельніцтва раённага Цэнтра культуры і народнай творчасці.
У гэты дзень такія ж віншаванні прымала яшчэ адна член сям’і загінулых з вёскі Дзямянаўцы – Юлія Казак.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#нашелучшее #нашалепшае
