14 студзеня віншаванні ад кіраўніцтва раёна з юбілейным днём нараджэння прымаў старшыня Дзятлаўскага філіяла Гродзенскага аблспажыўтаварыства Мікалай Гародка.
Шчырыя пажаданні моцнага здароўя, бадзёрасці духу, поспехаў ва ўсіх прафесійных пачынаннях, шчасця і дабрабыту ў адрас Мікалая Віктаравіча прагучалі ад старшыні Дзятлаўскага райвыканкама Андрэя Садоўскага.
– Пад вашым кіраўніцтвам Дзятлаўскі філіял паспяхова функцыянуе і плённа развіваецца, – адзначыў Андрэй Уладзіміравіч. – Нягледзячы на вялікае поле задач, якое ўключае не толькі гандаль, але і грамадскае харчаванне, прамысловасць, нарыхтоўкі, знашнеэканамічную дзейнасць, калектыву ўдаецца дасягаць пастаўленых мэт. Сёння крытэрыем ацэнкі дзелавых якасцяў кіраўніка ў сферы спажыўкааперацыі з’яўляецца ўменне працаваць ініцыятыўна, дабіваючыся поспехаў ва ўмовах жорсткай канкурэнцыі, і вам гэта выдатна ўдаецца. Няхай і надалей вас, як прафесіянала з важкім стажам, вылучаюць мэтанакіраванасць, цярпенне і шчырая праца, поспехаў вам на працоўнай ніве і ва ўласных справах.
– Вашы асабістыя і дзелавыя якасці спрыяюць рэалізацыі многіх складаных задач, – далучыўся да віншаванняў у адрас юбіляра намеснік старшыні райвыканкама Вадзім Бялятка. – Ваш філіял амаль адзіны, хто ахоплівае гандлёвым абслугоўваннем кожнага дзятлаўчаніна нават у самых аддаленых куточках раёна, а з далучэннем Навагрудскага ўчастка клопатаў і абавязкаў па забеспячэнні сацыяльных гарантый для насельніцтва прыбавілася. Штодзённая нялёгкая і адказная праца работнікаў спажыўтаварыства пад вашым кіраўніцтвам уносіць неацэнны ўклад у развіццё абодвух раёнаў і павышэнне якасці жыцця іх насельніцтва. Няхай і надалей яна будзе выніковай і плённай. Нястомнай вам энергіі, паспяховых наватарскіх ідэй і ўдачы на гэтым шляху. З юбілейным днём нараджэння!
У сваю чаргу Мікалай Віктаравіч падзякаваў прысутным за добрыя словы і шчырыя пажаданні, адзначыў, што падтрымка раённага кіраўніцтва заўжды дапамагае спраўляцца з цяжкасцямі і вырашаць няпростыя задачы, якія дыктуе час.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#нашелучшее #нашалепшае
