У аўтапарку цэнтра па забеспячэнні дзейнасці бюджэтных і іншых арганізацый папаўненне.
Сюды прыбыў новенькі МАЗ-365022 фургон-ізатэрма.
У чым асаблівасць гэтага транспартнага сродку? Справа ў тым, што прызначаны ён для перавозкі астуджаных і замарожаных прадуктаў. Ізатэрмаванне кузава выканана з сэндвіч-панэляў з уцяпляльнікам з пенаполіуўрэтану з ашалёўкай сцен і даху шклонапоўненым пластыкам. Унутры фургона падлога зроблена з вільгацетрывалай фанеры, пакрытай поліўрэтанавай заліўкай. Усе матэрыялы маюць сертыфікаты адпаведнасці па гігіене, дазваляюць выкарыстоўваць пры мыйцы хімічныя сродкі, а значыць, падтрымліваць належную чысціню.
Ключы ад новага аўто атрымаў вадзіцель цэнтра Сяргей Жых. Ён з задавальненнем садзіцца за руль у камфортны салон машыны і гатовы курсіраваць па вызначаных маршрутах да харчблокаў.
Якасцям і тэхнічным характарыстыкам новага аўтамабіля парадаваліся як начальнік аддзела адукацыі райвыканкама Марына Лашкоўская, так і кіраўнік Дзятлаўскага раённага цэнтра па забеспячэнні дзейнасці бюджэтных і іншых арганізацый Святлана Панасюк.
– Гэты ізатэрмічны транспарт набыты за бюджэтныя сродкі раёна, – расказала Марына Лашкоўская. – Ён дазволіць нам забяспечыць больш спрыяльныя ўмовы па арганізацыі харчавання навучэнцаў установаў адукацыі. Разам з прамымі пастаўкамі вытворцаў прадуктаў харчавання непасрэдна ва ўстановы адукацыі новая спецыялізаваная машына дасць магчымасць дастаўляць асобныя прадукты харчавання. Пры гэтым поўнасцю будуць захоўвацца іх якасць і бяспека пры перавозцы, яны будуць абаронены ад вільгаці і забруджвання.
– Патрабаванні да харчавання навучэнцаў і выхаванцаў установаў адукацыі дастаткова сур’ёзныя , – пацвердзіла Святлана Панасюк. – Іх неабходна выконваць. Менавіта таму сёлета ў чэрвені для дастаўкі прадуктаў ва ўстановы для Цэнтра па забеспячэнні дзейнасці бюджэтных і іншых арганізацый быў набыты грузавы МАЗ з ізатэрмічным кузавам за 168 тысяч рублёў. Мы вельмі ўдзячны старшыні Дзятлаўскага райвыканкама за дапамогу ў набыцці гэтага транспартнага сродку.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
