Пра работу на будаўнічых аб’ектах, кантроль за асобамі, якія злоўжываюць алкаголем і жывуць разам з пажылымі бацькамі, вынікі рэспубліканскага і раённага суботнікаў, перамогу дзятлаўскай каманды школьнікаў у рэспубліканскім моладзевым фестывалі-конкурсе “Медыясфера-2024” і іншыя тэмы гаварылі на штотыднёвай нарадзе ў старшыні райвыканкама Андрэя Садоўскага.
Што здарылася?
З такога пытання кіраўніка раёна ў адрас упраўлення сельскай гаспадаркі і харчавання райвыканкама пачалося абмеркаванне сельскагаспадарчых тэм. Пытанне датычылася зніжэння вытворчасці малака асобнымі гаспадаркамі. Спецыялістам прыйдзецца разабрацца. Як адзначыў Андрэй Садоўскі, зніжэнне надояў – гэта ўдар па эканоміцы прадпрыемства, паколькі малако цяпер асноўная таварная прадукцыя.
Што датычыцца пасяўной кампаніі, яравыя культуры пасеяны на 61 % плошчаў ад запланаванага. Да сяўбы кукурузы прыступілі ўсе гаспадаркі раёна.
Прадаўжаецца падрыхтоўка кормаўборачнай тэхнікі.
Праваахоўнікі скрупулёзна кантралююць веснавыя палявыя работы і ўвогуле дзейнасць адказных асобаў сельскагаспадарчых прадпрыемстваў. Як далажыў начальнік аддзела ўнутраных спраў райвыканкама Вадзім Шчурскі, на мінулым тыдні дома ў прыватнай гаспадарчай пабудове загадчыка адной з МТФ раёна было выяўлена больш за 500 кілаграмаў пшаніцы, больш за 200 – зернесумесі, больш за 200 – трыцікале, камбікорм, мінеральныя ўгнаенні і іншае. Легальнасць набыцця гэтай прадукцыі мужчына пацвердзіць не змог.
Ратавалі накапленні
У працяг тэмы правапарадку. Здаецца, штодня сродкі масавай інфармацыі папярэджваюць пра ўсе віды махлярства, якія сёння распаўсюджаны. Аднак амаль кожны тыдзень на Дзятлаўшчыне хтосьці трапляе на вуду тэлефонных або інтэрнэт-махляроў.
Сямейная пара з Дзятлава даверылася тэлефонным “службам бяспекі” і, каб уратаваць свае грошы, перавяла праз пошту на невядомыя рахункі тры плацяжы на агульную суму 11 тысяч 400 рублёў.
– Праяўляйце разважлівасць і не паддавайцеся на правакацыі зламыснікаў. Калі вам паступаюць званкі з “папярэджаннем” аб ашуканскіх дзеяннях з вашай карткай або вашым рахункам, калі вас запэўніваюць, што прама зараз спісваюцца грошы з вашай карткі, не верце – гэта махляры. Пакладзіце трубку і звярніцеся ў раённы аддзел міліцыі. Не пераходзьце па спасылках, якія высылаюць невядомыя суразмоўцы, – раіў пракурор раёна Віталій Юрго.
Напярэдадні Сусветнага дня аховы працы
Абмеркавалі на нарадзе, як ідуць справы па ахове працы работнікаў на Дзятлаўшчыне. Дарэчы, гэта тэма, у рамках абласных лічбаў, гучала і на абласной нарадзе. Было адзначана, што мінулыя гады на Гродзеншчыне адбывалася зніжэнне колькасці здарэнняў з цяжкімі наступствамі на вытворчасці, аднак 2023 год негатыўна “скарэктаваў” “трагічны” паказчык. Агульная колькасць траўмаваных на рабочых месцах склала ў мінулым годзе 233 чалавекі, з іх 74 атрымалі цяжкія траўмы, 13 загінулі. Пачатак 2024 года склаўся адносна лепш, аднак, як адзначылі спецыялісты, супакойвацца нельга, гэта штодзённая работа, пільнасць, кантроль з боку спецыялістаў па ахове працы на прадпрыемствах і ў арганізацыях і самакантроль, адказнасць саміх работнікаў.
На пастаяннай аснове ў Дзятлаўскім раёне працуе мабільная група па наглядзе за выкананнем аховы працы на прадпрыемствах. За першы квартал група абследавала 14 аб’ектаў, выявіла 133 парушэнні патрабаванняў бяспекі.
Для даведкі, пачынаючы з 2003 года, 28 красавіка Міжнародная арганізацыя працы праводзіць Сусветны дзень аховы працы, акцэнтуючы ўвагу на мерах па прадухіленні аварый і траўматызму на рабочым месцы. Тэма Сусветнага дня ў 2024 годзе – уплыў змянення клімату на бяспеку і гігіену працы.
Ірына КАМАРОВА
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
