Інфармацыйна-адукацыйная сустрэча з такой назвай прайшла ў пракуратуры Дзятлаўскага раёна ў рамках мерапрыемстваў да 80-годдзя пракуратуры Гродзенскай вобласці.
Удзел у ёй прымалі педагогі і навучэнцы сярэдніх школ № 1, № 3, гімназіі № 1 горада Дзятлава, Вензавецкай сярэдняй школы на чале з галоўным спецыялістам аддзела адукацыі райвыканкама Аленай Гарановіч.
Аб асаблівасцях і ўмовах паступлення на службу ў органы пракуратуры, праваабарончай дзейнасці, ролі пракуратуры ў забеспячэнні законнасці і правапарадку старшакласнікам расказаў пракурор Дзятлаўскага раёна Віталій Юрго. Ён падкрэсліў, што абавязковым “пропускам” у прафесію для ўсіх жадаючых без выключэння з’яўляецца найперш законапаслухмяны лад жыцця і прынцыповая жыццёвая пазіцыя, затым грунтоўныя веды, старанне і жаданне развівацца ў гэтай сферы. Расказаў, што на пасаду пракурорскага работніка можа быць прызначаны грамадзянін Рэспублікі Беларусь з вышэйшай юрыдычнай адукацыяй, неабходнымі прафесійнымі і маральнымі якасцямі, які адпавядае патрабаванням, прадугледжаным заканадаўствам аб дзяржаўнай службе. А вось “перашкодаў” на шляху ў гэту прафесію нямала: ад адсутнасці грамадзянства або наяўнасці судзімасці да неадпаведнасці па стане здароўя або адмове ад праходжання спецыяльнай праверкі. Асобы, якія паступаюць на службу ў органы пракуратуры, павінны здаць кваліфікацыйны экзамен і прайсці стажыроўку.
Аб сваёй “дарозе” ў прафесію расказала супрацоўніца з самым “важкім” стажам – памочнік пракурора Ірына Забеліна, выпускніца юрыдычнага факультэта Беларускага дзяржаўнага ўніверсітэта, якая працуе ў пракуратуры Дзятлаўшчыны з 1992 года. Юнакам і дзяўчатам яна параіла ўпэўнена і настойліва ісці да сваіх мэтаў, калі жадаюць звязаць жыццё з органамі пракуратуры.
Паколькі сёлета Беларусь святкуе 80-ю гадавіну вызвалення ад нямецка-фашысцкіх захопнікаў, Віталій Юрго не абышоў увагай тэму генацыду беларускага народа ў гады Вялікай Айчыннай вайны, расказаў аб расследаванні крымінальнай справы, узбуджанай Генеральнай пракуратурай Рэспублікі Беларусь у 2021 годзе.
Каля інфармацыйнага кутка з фотаздымкамі былых пракурораў нашага раёна Віталій Станіслававіч узгадаў імёны людзей, якія ў розныя гады рабілі свой уклад у захаванне законнасці і справядлівасці.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
