У Дзятлаўскі раён паступіла першая партыя (тысяча дозаў) супрацьгрыпознай вакцыны.
У гэтым годзе вакцына расійскай вытворчасці, якая мае назву “Вакцына для прафілактыкі грыпу”, аднакампанентная, інактываваная.
Перш за ўсё прафілактычную прышчэпку на бясплатнай аснове дзятлаўскія медыкі прапануюць дарослым, якія пакутуюць хранічнымі захворваннямі, і дзецям – яны патрабуюць першачарговай абароны ад небяспечнага захворвання.
Усяго ў Дзятлаўскім раёне ў 2023 годзе плануецца прышчапіць ад грыпу 36,8 % насельніцтва. Сучасныя вакцыны добра пераносяцца як дзецьмі, так і дарослымі, спрыяюць фарміраванню высокаспецыфічнага імунітэту ўжо праз 14-21 дзень пасля вакцынацыі, дзеянне якога захоўваецца да 6-12 месяцаў.
Нагадаем, што бясплатная вакцынацыя супраць грыпу праводзіцца:
* дзецям ва ўзросце ад 6 месяцаў да 3-х гадоў;
* пацыентам з хранічнымі захворваннямі;
* цяжарным;
* выхаванцам дашкольных установаў;
* навучэнцам установаў адукацыі;
* студэнтам;
* дарослым, якія маюць высокую рызыку заражэння на грып у сувязі з прафесійнай дзейнасцю;
* асобам, старэйшым за 65 гадоў.
Грамадзяне, якія не ўваходзяць у гэтыя групы, змогуць вакцынавацца за кошт сродкаў прадпрыемстваў і асабістых сродкаў.
Атрымаць прафілактычную прышчэпку можна будзе ў амбулаторна-паліклінічных арганізацыях аховы здароўя па месцы жыхарства.
Памятайце, што вакцынацыя – гэта адзіны спецыфічны і таму самы эфектыўны шлях прафілактыкі грыпу і яго ўскладненняў.
Таццяна КАСІЛА,
памочнік доктара-эпідэміёлага Дзятлаўскага райЦГЭ
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
