Усе мы родам з дзяцінства

Міжнародны дзень абароны дзяцей на Дзятлаўшчыне распачаўся святочнымі мерапрыемствамі ў навучальных установах і бібліятэках раёна.

Выхаванцы ўсіх узроставых груп дзіцячага сада № 1 горада Дзятлава паўдзельнічалі ў квэст-гульні “Рознакаляровае лета”, у час якой разам з казачнымі героямі адшукалі чароўныя бусіны.

На стадыёне “Колас” быў дадзены старт рэспубліканскай акцыі “Правільнае лета”, у межах якой прайшла спартландыя. Хуткасць, спрыт, камандны дух і добры настрой у час вясёлых стартаў паказалі ўдзельнікі спартыўнага летніка з дзённым знаходжаннем “Алімпіец”.

Для юных аматараў літаратурна-музычнага адпачынку прайшла сустрэча ў раённай бібліятэцы. На інтэрактыўнай пляцоўцы “Летні кніжны сусвет дзяцінства” школьнікі мелі магчымасць пагуляць у настольныя гульні, паадгадваць загадкі, паспяваць разам з вядучымі і проста адпачыць на палянцы з добрай кнігай.