Спаборніцты першынства вобласці па футболе сярод юнакоў 2005-2007 гадоў нараджэння, якія прайшлі ў чэрвені ў рамках абласной спартакіяды “Каласок” сярод сельскіх жыхароў, ладзіліся ў розных рэгіёнах вобласці.
Зборная каманда Дзятлаўскага раёна стала бронзавым прызёрам першынства вобласці па футболе і паднялася на трэцюю прыступку п’едэстала. Каманду Дзятлаўшчыны прадставілі выхаванцы з пяці ўстановаў адукацыі раёна: Максім Баравік, Уладзіслаў Урбан, Мікіта Марук, Максім Гародка, Аляксей Шалесны – спартсмены Казлоўшчынскай СШ; Юрый Мікульскі, Андрэй Сямёнаў, Максім Кароль – выхаванцы Вензавецкай СШ; Андрэй Зуеў, Уладзіслаў Штэйзель, Тарас Казачок – выхаванцы Гезгалаўскай СШ; Аляксей Кастусік і Дзяніс Марук – спартсмены Дварэцкай СШ і Андрэй Муха – выхаванец гімназія №1 горада Дзятлава.
На групавым этапе спаборніцтваў каманда Дзятлаўскага раёна з лікам 5:0 перамагла зборную каманду Свіслацкага раёна. Унічыю дзятлаўчане згулялі з камандай Ваўкавыскага раёна.
У першы дзень фінальнага этапу спаборніцтваў, якія праходзілі ў горадзе Масты, зборная каманда дзятлаўчан з лікам 3:1 перамагла каманду Іўеўскага раёна, у другім матчы дзятлаўчане саступілі камандзе Шчучынскага раёна з лікам 0:3.
У наступны дзень спаборніцтваў зборная каманда Дзятлаўскага раёна з лікам 1:0 атрымала перамогу над футбалістамі з Карэліч.
Ва ўпартай барацьбе за “бронзу” з лікам 1:0 дзятлаўчане перамаглі гаспадароў пляцоўкі – зборную каманду Мастоўскага раёна.
Па выніках спаборніцтваў першынства вобласці па футболе пераможцамі і ўладальнікамі залатых медалёў стала зборная каманда Смаргонскага раёна, сярэбраныя прызёры – каманда Шчучынскага раёна, трэцяе месца і бронзавыя медалі атрымала зборная каманда Дзятлаўшчыны.
Рашэннем судзейскай калегіі лепшым нападаючым прызнаны Юрый Мікульскі, лепшым варатаром стаў Максім Баравік.
Рыхтуе зборную каманду Дзятлаўскага раёна да спаборніцтваў інструктар-метадыст Дзятлаўскага ФСК Аляксандр Белавус.
Аксана АНДАЛЮКЕВІЧ
