23 студзеня на Дзятлаўшчыне прайшлі сустрэчы ў працоўных калектывах і па месцы жыхарства. З вынікамі работы сацыяльнай сферы Дзятлаўскага раёна жыхароў Наваельнянскага сельскага савета пазнаёміў старшыня Дзятлаўскага раённага Савета дэпутатаў Аляксандр Бараноўскі.
– У 2018 годзе была прадоўжана работа па падтрыманні на належным узроўні ўстановаў сацыяльнай сферы, – зазначыў Аляксандр Станіслававіч. Ён спыніўся на шэрагу значных накірункаў, такіх, як ахова здароўя, сацыяльная абарона, адукацыя, культура, ідэалогія, моладзевая палітыка, санаторна-курортнае лячэнне, работа сродкаў масавай інфармацыі. Расказаў, што ў раёне выконваюцца патрабаванні сацыяльных стандартаў, абнаўляецца і папаўняецца матэрыяльна-тэхнічная база ўстановаў сацыяльнай сферы. Сярод іншага, цікава было даведацца, што ў 2018 годзе навучэнцы раёна заваявалі 4 дыпломы на абласным этапе рэспубліканскай алімпіяды па вучэбных прадметах, а гімназіст Ілья Угрын па выніках заключнага (рэспубліканскага) этапу ўзнагароджаны дыпломам другой ступені па матэматыцы. Палепшылася летась і выніковасць удзелу ў творчых конкурсах, дзе навучэнцамі заваявана 89 узнагародаў абласнога ўзроўню, 8 – рэспубліканскага, 4 – міжнароднага. У абласной ваенна-патрыятычнай гульні “Зарніца” каманда Гезгалаўскай сярэдняй школы атрымала дыплом другой ступені. Спартсмены раёна папоўнілі скарбонку ўзнагародаў 50 прызавымі месцамі (42 – абласныя, 8 – рэспубліканскіх), яшчэ 7 узнагародаў рэспубліканскага ўзроўню заваёвана ў складзе зборных каманд вобласці.
У 2018 годзе прадоўжана работа па развіцці культурнага абслугоўвання насельніцтва. Летась быў праведзены рамонт Дзятлаўскай раённай бібліятэкі, Наваельнянскага і Хвінявіцкага дамоў культуры, устаноўлены сістэмы відэаназірання ў Дзятлаўскай і Наваельнянскай дзіцячых школах мастацтваў, Жукоўшчынскім і Хвінявіцкім дамах культуры. Найбольш значнымі мерапрыемствамі года мінулага былі суправаджэнне выбарчай кампаніі ў мясцовыя Саветы дэпутатаў Рэспублікі Беларусь, 75-годдзе Хатынскай трагедыі, фестываль “Зецельскі фэст”, 520-годдзе горада Дзятлава, адкрыццё этнаграфічнай экспазіцыі “Побытавая культура беларускага селяніна” на базе Дварэцкага дома культуры, міжнародная навукова-практычная канферэнцыя “Гісторыка-культурная спадчына Дзятлаўшчыны”, 100-годдзе Усесаюзнага Ленінскага Камуністычнага Саюза Моладзі, урачыстыя сходы і канцэрты да Дня яднання народаў Беларусі і Расіі, Дня Перамогі, Дня Незалежнасці. Рэалізаваны новы этна-праект “Народнаму скарбу – век векаваць”, прадоўжана рэалізацыя праекта “Дбайных людзей славім, весела час бавім”.
Шмат увагі надавалася моладзевай палітыцы. У трэцім працоўным семестры раённай арганізацыяй ГА “БРСМ” пры садзейнічанні зацікаўленых структураў былі працаўладкаваны 203 чалавекі, 308 маладых людзей працавалі ў складзе добраахвотніцкіх і валанцёрскіх атрадаў. Валанцёры школ на працягу года наведвалі адзінокіх састарэлых грамадзян і ветэранаў, аказвалі ім пасільную дапамогу, займаліся добраўпарадкаваннем прышкольных тэрыторый, аказаннем дабрачыннай дапамогі. Пад дэвізам “Радасць у кожны дом!” праходзілі рэйды “Ветэран жыве побач” і “Дзеці – ветэранам”. У жніўні 2018 года сям’я Качмарык (Вензавец) дастойна прадставіла раён на абласным этапе рэспубліканскага конкурсу “Уладар сяла”.
Аляксандр Бараноўскі прывёў і іншыя цікавыя лічбы і факты, а напрыканцы свайго выступлення зрабіў выснову, што аддзеламі, упраўленнямі і ўстановамі сацыяльнай сферы праводзіцца пэўная работа па рэалізацыі пастаўленых гадавых задач, прынятых планаў, выкананні дзяржаўных сацыяльных стандартаў.
Ірына СТЫРНІК
