Неабходна ведаць правілы паводзінаў у час навальніцы і як абараняцца ад паражэння маланкай.
Перад навальніцай неабходна зачыніць вокны, дзверы і дымаходы. Не дапускайце скразняка, бо ён можа прыцягнуць шаравую маланку. У час навальніцы нельга паліць печку, паколькі дым, які ідзе з трубы, мае высокую электраправоднасць. Неабходна трымацца як мага далей ад электраправодкі, антэнаў, вокнаў і дзвярэй, адключыць ад сеткі тэлевізары і радыёпрыёмнікі.
Калі навальніца застала вас у полі, нельга хавацца ў невялікіх стагах з сенам, пад дрэвам, якое расце адно. Не заставайцеся на ўзвышшах і ў адкрытых неабароненых месцах, асабліва паблізу металічных агароджаў, вільготных сцен, зазямлення маланкаадводу.
Знайдзіце лагчыну і схавайцеся там, лажыцеся на зямлю, падціснуўшы ногі і абняўшы рукамі калені.
Не раскрывайце над сабой парасон, не падымайце над галавой доўгія сельскагаспадарчыя прылады. Калі ў час навальніцы аказаліся ў лесе, схавайцеся пад нізкарослыя дрэвы.
У час навальніцы нельга купацца, лавіць рыбу. Калі едзеце на веласіпедзе або матацыкле, спыніцеся і адыдзіце ад іх на адлегласць не менш за 30 метраў. У аўтамабілі ў час навальніцы вы ў бяспецы, толькі неабходна спыніцца, зачыніць вокны і апусціць аўтамабільную антэну.
В. КЕЦЬ,
начальнік Дзятлаўскай энергаінспекцыі