Старшыня Савета Рэспублікі Нацыянальнага сходу Рэспублікі Беларусь Наталля Качанава 16 мая сустрэлася з жаночым актывам абласной арганізацыі грамадскага аб’яднання “Беларускі саюз жанчын”.
Сустрэча адбылася ў Гродзенскім дзяржаўным універсітэце імя Янкі Купалы ў фармаце адкрытага дыялога, удзел у ёй прынялі 120 актывістак БСЖ Прынёмання.
У час размовы спікер адзначыла, што грамадскія арганізацыі павінны працаваць так, каб людзям хацелася ў іх прыйсці па закліку сэрца і разам рабіць важныя, патрэбныя справы як для сваёй арганізацыі, так і для краіны ў цэлым. Наталля Качанава падкрэсліла, што жанчыны – гэта дабрыня, міласэрнасць, спагадлівасць, усё тое, што ўласціва беларусам. Менавіта такія якасці яны павінны прыўносіць у грамадства, быць стваральніцамі, на гэта і нацэлена работа Беларускага саюза жанчын.
Уражаннямі ад сустрэчы ў Гродне падзяліліся дзятлаўчанкі.
Алена Васкель, старшыня раённай арганізацыі ГА “БСЖ”:
– Ад сустрэчы з Наталляй Іванаўнай, якую арганізавала Гродзенская абласная арганізацыя ГА “БСЖ”, знаходжуся пад глыбокім уражаннем. Гэта жанчына прываблівае сваімі энергіяй, мэтанакіраванасцю, адкрытасцю, жаданнем падзяліцца тым, што цікавіць і хвалюе нашых суайчыннікаў. У выступленні Наталля Качанава расказала, чым сёння займаецца Савет Рэспублікі, якія прымаюцца законапраекты, чым жыве краіна. Спынілася і на пытаннях, з якімі звяртаюцца людзі.
У горад Гродна спікер прыехала яшчэ і для таго, каб сустрэцца з матушкай Гаўрыілай і разгледзець магчымасць рэалізацыі праекта па стварэнні ў рэспубліцы прытулку для дзяцей-сірот пры манастыры. Такі вопыт ужо існуе ў Расіі, як прыклад – Пакроўскі манастыр, дзе знаходзяцца мошчы Матроны Маскоўскай. Ёсць надзея, што дзеці, выхаваныя ў падобных прытулках, не трапяць пад “каток” прапаганды і дэструктыўнай ідэалогіі.
У час сустрэчы Наталля Іванаўна адказвала на пытанні ўдзельніц форуму, заадно прыводзячы прыклады са свайго асабістага жыцця. Хоць сустрэча доўжылася амаль тры гадзіны, на жаль, засталіся і незаданыя пытанні. Тым не менш, Старшыня Савета Рэспублікі падкрэсліла, што яна заўсёды адкрыта да дыялога і знойдзе час, каб сустрэцца, пагутарыць, дапамагчы, выслухаць прапановы, асабліва, калі яны будуць цікавыя і важныя заканадаўча і ў цэлым для нашай краіны.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
