Пагадзіцеся, вельмі зручна звярнуцца да спецыялістаў, аператыўна атрымаць кансультацыю па ўсіх пытаннях, якія ўзнікаюць, у адным месцы.
Для гэтага працуе служба “адно акно”, якая ёсць і на Дзятлаўшчыне.
З 1 студзеня служба пераехала ў новы адрамантаваны будынак па адрасе: горад Дзятлава, вуліца Чырвонаармейская, 21 (уваход з тарца). Для грамадзян складзены зручны графік работы: панядзелак, аўторак, чацвер, пятніца – з 8 да 17 гадзін, серада – з 8 да 20 гадзін без перапынку на абед.
Аб выніках работы падраздзялення за 2022 год расказала галоўны спецыяліст аддзела па юрыдычнай рабоце, зваротах грамадзян і юрыдычных асобаў райвыканкама, кіраўнік службы Станіслава Ганчар:
– За 2022 год па заявах зацікаўленых асобаў, прынятых у службе “адно акно” Дзятлаўскага раённага выканаўчага камітэта, праведзена 2585 адміністрацыйных працэдур (з іх па заявах грамадзян – 2212 і 373 – па заявах юрыдычных асобаў і індывідуальных прадпрымальнікаў). Ажыццяўляецца таксама прыём па іншых пытаннях, па якіх прынята больш за 480 заяваў (дзяржаўная рэгістрацыя юрыдычных асобаў і індывідуальных прадпрымальнікаў, выдача грамадзянам унікальных ідэнтыфікатараў, прыём пісьмовых апавяшчэнняў ад суб’ектаў гаспадарання аб пачатку ажыццяўлення дзейнасці, прыём заяваў ад суб’ектаў гаспадарання для ўнясення змяненняў і (або) дапаўненняў ва ўстаноўчыя дакументы і іншае).
Асноўнымі задачамі службы з’яўляюцца прыём заяваў ад грамадзян і юрыдычных асобаў, кансультаванне па пытаннях ажыццяўлення адміністрацыйных працэдур, накіраванне запытаў і афармленне пакета дакументаў, неабходных для падрыхтоўкі праектаў рашэнняў, выдача даведак з наяўных інфармацыйных рэсурсаў, апавяшчэнне грамадзян і юрыдычных асобаў аб прынятым рашэнні.
– З якімі запытамі найчасцей звяртаюцца ў “адно акно”?
– З кожным годам пералік адміністрацыйных працэдур, па якіх можна звярнуцца ў службу, пашыраецца. Сёння іх больш за 180. Аналіз сведчыць, што найбольш запатрабаванымі з’яўляюцца працэдуры ў сферы працы і сацыяльнай абароны, у асноўным гэта атрыманне дапамог і прадастаўленне льгот (909 заяваў), архітэктуры і будаўніцтва (164 заявы), жыллёвых праваадносін (467 заяваў), адукацыі (435 заяваў), рэгістрацыя дагавора найму або арэнды жылога памяшкання (132 заявы). Найбольшая колькасць зваротаў ад юрыдычных асобаў і індывідуальных прадпрымальнікаў прыпадае на сферу жыллёва-камунальнай гаспадаркі, архітэктуры і будаўніцтва райвыканкама (167 заяваў) і эканомікі (120 заяваў).
Звяртаюцца грамадзяне з мінімальным пакетам дакументаў, вызначаным заканадаўствам для ажыццяўлення адміністрацыйнай працэдуры. Астатнія неабходныя дакументы запытваюцца спецыялістам службы. Так за 2022 год накіравана больш за 2000 запытаў.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga