Адна з формаў працаўладкавання інвалідаў – гэта іх адаптацыя да працоўнай дзейнасці.
Пры гэтым важна памятаць, што будуецца яна на індывідуальным падыходзе: найперш улічваюцца псіхафізічныя асаблівасці такога беспрацоўнага, яго медыцынскія паказанні да працы, адукацыйны ўзровень, наяўнасць прафесійных навыкаў і асабістыя пажаданні. Адаптацыя інвалідаў – гэта мерапрыемствы, скіраваныя на:
– набыццё і ўдасканаленне інвалідамі прафесійных ведаў, уменняў і навыкаў з улікам атрыманай ці наяўнай у іх спецыяльнасці (прафесіі);
– набыццё, аднаўленне і развіццё працоўных здольнасцяў і замацаванне іх у працэсе працоўнай дзейнасці;
– павышэнне канкурэнтаздольнасці інвалідаў на рынку працы;
– працаўладкаванне ў адпаведнасці з атрыманай або наяўнай спецыяльнасцю (прафесіяй).
Ажыццяўляцца яна можа ў арганізацыях любых арганізацыйна-прававых формаў, а таксама ў індывідуальных прадпрымальнікаў (далей – наймальнікаў) на тэрмін ад шасці месяцаў да аднаго года. Фінансаванне мерапрыемстваў па адаптацыі інвалідаў да працоўнай дзейнасці ажыццяўляецца за кошт сродкаў дзяржаўнага пазабюджэтнага Фонду сацыяльнай абароны насельніцтва органамі па працы, занятасці і сацыяльнай абароне ў выглядзе выдзялення наймальнікам грошай на набыццё абсталявання, матэрыялаў, спецадзення, кампенсацыю выдаткаў па аплаце працы інвалідаў.
Для атрымання дадзенай кампенсацыі наймальнікі штомесяц павінны прадастаўляць ва ўпраўленне па працы, занятасці і сацыяльнай абароне даведку аб выдатках на аплату працы інвалідаў з указаннем перыяду, за які налічана заработная плата.
Даведка: у названыя выдаткі ўключаюцца налічаная заработная плата за фактычна адпрацаваны час і выкананую работу, сумы сярэдняга заробку, які захоўваецца за час працоўнага водпуску, грашовай кампенсацыі за нявыкарыстаны працоўны водпуск, сумы абавязковых страхавых узносаў у Фонд сацыяльнай абароны насельніцтва Міністэрства працы і сацыяльнай абароны і страхавых узносаў па абавязковым страхаванні ад няшчасных выпадкаў на вытворчасці і прафесійных захворванняў.
Па больш падрабязную інфармацыю наконт адаптацыі інвалідаў да працоўнай дзейнасці можна звяртацца ва ўпраўленне на адрас: г. Дзятлава, вул. Кастрычніцкая, 56, каб. 7-8. Тэлефоны для даведак: 2-27-01, 3-39-23.
Ірына БАРАВІК,
намеснік начальніка аддзела па працы і занятасці ўпраўлення па працы, занятасці і сацыяльнай абароне райвыканкама
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
