Памяць не гасне праз гады (+відэа)

У Дзень усенароднай памяці ахвяраў Вялікай Айчыннай вайны эстафета памяці праходзіць на Дзятлаўшчыне.

Супрацоўнікі Парэцкага сельвыканкама, упраўлення па працы, занятасці і сацыяльнай абароне райвыканкама, мясцовыя жыхары Парэцкага сельсавета наведалі вёску Дубраўка, якая была знішчана фашысцкімі карнікамі. У 1942 годзе тут было спалена 47 дамоў, расстраляны 98 чалавек, 22 – звезены на катаржную работу ў Германію.

– Сёння, у памятны і трагічны для беларусаў дзень, калі пачалася Вялікая Айчынная вайна, мы ўшаноўваем памяць загінулых у ваенныя гады мясцовых жыхароў,– адзначыў старшыня Парэцкага сельвыканкама Аляксандр Ядэйка.

Прысутныя ўсклалі кветкі да помніка савецкім салдатам, ушанавалі памяць ахвяраў вайны хвілінай маўчання.

У гэты ж дзень старшыня раённага аб’яднання прафсаюзаў Валерый Макарчык, супрацоўнікі Дзятлаўскага гісторыка-краязнаўчага музея, работнікі мясцовага сельвыканкама наведалі памятныя мясціны казлоўшчынскай зямлі. На тэрыторыі сельскага савета – найбольшая колькасць населеных пунктаў, пацярпелых ад фашысцкіх карнікаў. У вёсцы Трахімавічы зімой 1942 года былі расстраляны 142 са 165 жыхароў, усе дамы, акрамя аднаго, былі спалены. У пасляваенны час вёска так і не змагла аднавіцца ў сваім ранейшым выглядзе. У Гарадках фашысты пад выглядам праверкі дакументаў вывелі на ўскраіну вёскі і расстралялі 290 мірных жыхароў. Моцна пацярпела ад фашысцкай навалы і вёска Малая Воля.

– Кожны год мы праводзім тэматычныя мерапрыемствы, прысвечаныя пачатку Вялікай Айчыннай вайны, – расказаў старшыня Казлоўшчынскага сельвыканкама Вадзім Бялятка. – Выязджаем у пацярпелыя вёскі, сустракаемся з мясцовымі жыхарамі, прыводзім у гэтыя памятныя мясціны дзяцей, расказваем ім пра тыя жахлівыя часы, каб новыя пакаленні не забывалі аб трагедыі сваіх землякоў, каб самая страшная вайна чалавецтва не паўтарылася.