На штотыднёвай рабочай нарадзе ў старшыні райвыканкама былі ўзняты тэмы бяспекі жыццядзейнасці насельніцтва, навядзення парадку на зямлі, вясенне-палявых работ і іншыя.
Актывізуем электронны дакументаабарот
Падводзіць прамежкавыя вынікі па пераходзе арганізацый раённай формы ўласнасці на электронны дакументаабарот на адным з пасяджэнняў райвыканкама было вырашана штоквартальна. Кіраўнік спраў райвыканкама Аляксандр Андруцэвіч расказаў, што ў першым квартале 2021 года ўзровень выкарыстання сістэмы міжведамаснага электроннага дакументаабароту па раёне сярод арганізацый раённай формы ўласнасці ўзрос да 42,5 %. Больш актыўнай работы ў гэтым кірунку чакаюць ад аддзела адукацыі райвыканкама і арганізацый яму падначаленых, упраўлення сельскай гаспадаркі і харчавання райвыканкама, арганізацый, падначаленых аддзелу ідэалагічнай работы, культуры, і па справах моладзі райвыканкама, КСУПаў “Хвінявічы” і Жукоўшчына”, ААТ “Граніт-Агра”.
Дзе быў пажар і дзе палілі расліннасць?
На мінулыім тыдні пажар з гібеллю мужчыны адбыўся ў вёсцы Карытніца, састарэлая жанчына атрымала апёкі. Прычыны здарэння выяўляе Следчы камітэт. Кіраўнік раёна парэкамендаваў на пасяджэнні рабочай групы прааналізаваць работу аглядавай камісіі Парэцкага сельвыканкама.
Узгаранне смецця з далейшым распаўсюджаннем агню на сухую расліннасць адбылося 5 красавіка ў гарадскім пасёлку Казлоўшчына. Палы сухой расліннасці зафіксаваны ў Дварэцкім, Новаяльнянскім, Дзятлаўскім сельсаветах. На гэтым тыдні прафілактычная работа ў гэтым кірунку ў раёне будзе ўзмоцнена з прыцягненнем вінаватых да адміністрацыйнай адказнасці.
Выяўлены крадзеж у гаспадарцы
Па выніках агляду мехдвароў гаспадарак раёна, які ладзіўся на мінулым тыдні, былі прыцягнуты да адміністрацыйнай адказнасці асобы, якія дапусцілі парушэнні пры захоўванні металалому. Таксама міліцыяй праведзена 8 рэйдаў, 6 з якіх – па праверцы вартавой аховы і асветленасці сельгасаб’ектаў. Аднаго вартаўніка малочнатаварнай фермы на працоўным месцы не засталі. Два рэйды праводзіліся па выяўленні крадзяжоў гаруча-змазачных матэрыялаў: устаноўлена, што работнік КСУП “Вензавец” скраў 30 літраў дызельнага паліва.
Кіраўнік раёна даручыў праваахоўнікам прадоўжыць праверку захаванасці матэрыяльных каштоўнасцяў у гаспадарках раёна.
Добраўпарадкаванню – зялёнае святло
Актыўна ў раёне прайшоў “Тыдзень лесу”, работа па высадцы дрэў у лясных масівах будзе прадоўжана на гэтым тыдні і ў час Рэспубліканскага суботніка.
У рамках Года народнага адзінства праходзіць акцыя “Пасадзі дрэва”. З’яўляюцца маладзенькія пасадкі і ў населеных пунктах Дзятлаўшчыны. 21 красавіка ліставыя пароды дрэў каля абеліска Славы ў Дзятлаве збіраюцца садзіць члены моладзевага парламента.
Увогуле, бягучы тыдзень скіраваны на навядзенне парадку на зямлі: арганізацыі раёна павінны ачысціць замацаваныя за імі тэрыторыі, актыўнасці чакаюць і ад жыхароў населеных пунктаў. Расце тэмпературны фон, таму камунальнікі збіраюцца прыступіць да ямачнага рамонту вуліц. Работа па выдаленні дрэў і ачыстцы тэрыторыі ад кустоўя ідзе на могілках гекаторых вёсак раёна. Спецыялісты раённай інспекцыі прыродных рэсурсаў і аховы навакольнага асяроддзя правядуць маніторынг на наяўнасць несанкцыянаваных звалак на тэрыторыі Дзятлаўшчыны, разам з райЦГЭ яны правераць і суб’екты гаспадарання.
Сеюць і рамантуюць кормаўборачную тэхніку
Гаспадаркі Дзятлаўшчыны ўжо пасеялі 69 % ранніх яравых культур. На гэтым тыдні збіраюцца прыступіць да сяўбы лёну. Сярод надзённых задач – уносіць арганічныя ўгнаенні пад ворыўныя культуры, пачаць рамонт кормаўборачнай тэхнікі, праверыць насенне кукурузы.
Вясенне-палявыя работы ў раёне ідуць на дастойным узроўні: ад мінулагодняга графіка адстае ўсяго на 4 дні, але на гэтым тыдні плануецца “нагнаць” упушчаны з-за холаду час.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
