Што педагогі абмяркоўвалі з дэпутатам?

Свежыя навіны Улада

Адбыўся планавы савет аддзела адукацыі райвыканкама, удзел у якім прыняў дэпутат Палаты прадстаўнікоў Нацыянальнага сходу Рэспублікі Беларусь па Нёманскай выбарчай акрузе № 56 Уладзімір Сіняк.

– Педагогі Беларусі актыўна ўключаюцца ў абмеркаванне новага Кодэкса аб адукацыі. Гэты законапраект асноўны для нацыянальнай сістэмы адукацыі, ад таго, як ён будзе вывучаны і распрацаваны, з якім зместам прыняты, залежаць многія кірункі яе далейшага развіцця, – задала тон размове начальнік аддзела адукацыі райвыканкама Наталля Белаус.

Звяртаючыся да прысутных, Уладзімір Сіняк у сваю чаргу падкрэсліў, што яго дэпутацкая дзейнасць скіравана на абарону інтарэсаў выбаршчыкаў. Нягледзячы на тое, што сам ён уваходзіць у камісію па прамысловасці, паліўна-энергетычным комплексе, транспарце і сувязі, як дэпутат, ён прымае ўдзел у абмеркаванні і галасаванні па ўсіх законапраектах, якія паступаюць у Палату прадстаўнікоў, і, каб ведаць, што сёння хвалюе спецыялістаў-практыкаў, стараецца падтрымліваць зваротную сувязь з выбаршчыкамі.

Гаворачы пра падрыхтоўку новага Кодэкса аб адукацыі, Уладзімір Аляксандравіч зазначыў, што ў пастаянную камісію па адукацыі, культуры і навуцы ўжо пачалі паступаць прапановы з рэгіёнаў. Дэпутат падкрэсліў важнасць гэтага працэсу, ад вынікаў якога напрамую залежыць далейшае развіццё нацыянальнага чалавечага капіталу, значыць, і паспяховасць беларускай эканомікі. У новай рэдакцыі Кодэкса асноўны ўхіл неабходна зрабіць на цеснай сувязі адукацыі з навукай і вытворчасцю, раскрыцці творчага патэнцыялу асобы. Навукова-даследчая база вышэйшай школы павінна генерыраваць новыя ідэі, якія дапамогуць беларускім вытворцам выпускаць інавацыйную прадукцыю з вялікім даданым коштам, запатрабаваную на знешнім рынку, і “зарабляць” грошы для краіны і далейшага развіцця беларускай эканомікі і навукі.

Наталля Белаус адзначыла, што сярод пытанняў, найбольш актуальных для сферы адукацыі раёна – недахоп настаўнікаў-прадметнікаў і неабходнасць удасканалення матэрыяльна-тэхнічнай базы ўстановаў. Апошнюю праблему ў васьмі ўстановах агульнай сярэдняй адукацыі раёна разлічваюць вырашыць з дапамогай рэалізацыі праекта па капітальным рамонце за кошт грантаў Міжнароднага банка развіцця і рэканструкцыі.

Наталля Сяргееўна запэўніла дэпутата, што педагагічным актывам Дзятлаўшчыны ў бліжэйшы час будуць абмеркаваны праблемныя пытанні сферы і падрыхтаваны пакет прапановаў ад нашага раёна для новага Кодэкса аб адукацыі.

Дэпутат паабяцаў, што ўсе яны будуць перададзены ў пастаянную камісію па адукацыі, культуры і навуцы, пазней на кожную з іх прыйдзе афіцыйны адказ.

Размаўляючы з педагогамі, Уладзімір Сіняк не мог не спыніцца і на распрацоўцы галоўнага для нашай краіны законапраекта – новай Канстытуцыі Рэспублікі Беларусь. Плануецца, што змененая Канстытуцыя ў сёлетнім жніўні будзе прадстаўлена кіраўніку дзяржавы, а ў канцы гэтага ці пачатку наступнага года – вынесена на ўсенароднае галасаванне. У канстытуцыйную камісію ўжо паступіла больш за 6 тысяч прапановаў. Магчыма, некаторыя з іх не лягуць у аснову галоўнага дзяржаўнага дакумента, але могуць быць выкарыстаны ў іншых законапраектах. Дэпутат заклікаў і педагогаў Дзятлаўшчыны далучыцца да гэтага працэсу.

Ірына СТЫРНІК