Як справы з планавымі паказчыкамі?

20 чэрвеня старшыня Дзятлаўскага раённага выканаўчага камітэта Аляксандр Дубовік наведаў ДЛГУ “Дзятлаўскі лясгас”, дзе перад калектывам выступіў са справаздачай аб выніках сацыяльна-эканамічнага развіцця Дзятлаўскага раёна за гэты год.

– Сярод больш дзесяці вызначаных прагнозных паказчыкаў па розных накірунках сацыяльна-эканамічнага развіцця Дзятлаўшчына не дасягнула планавых лічбаў толькі па трох, – зазначыў кіраўнік раёна, – у іх ліку – экспарт паслугаў. У “абласной скарбонцы” мы забяспечваем 57% гэтага паказчыка, што ажыццяўляецца за кошт санаторыяў “Радон” і “Альфа Радон”. Калі першы з іх “загружаны” адпачывальнікамі на 102%, то другі нязначна адстаў ад мінулагодніх лічбаў і паўплываў на раённую статыстыку.

Недавыканалі ў раёне і план па будаўніча-мантажных работах, на што паўплывала спыненне і перанясенне на больш позні тэрмін работ па ўзвядзенні новага пажарнага дэпо (фінансуецца за кошт рэспубліканскага бюджэту). Планаваўся сёлета ўвод у эксплуатацыю спіртасховішча Дзятлаўскага лікёра-гарэлачнага завода “Алгонь”, але з-за падыхода да аб’екта грунтовых водаў, праекціроўшчыкам давялося ўносіць карэкцівы ў план работ. Напрыканцы года спадзяёмся план выканаць.

Ніжэй за абазначаны з пачатку года ў раёне паказчык па выкананні тавараабароту. Гэта адбылося з-за памяншэння выручкі магазіна “Еўраопт”, спецыялісты аналізуюць сітуацыю.

У студзені-маі 2019 года пэўных вынікаў раён дасягнуў у аграрным сектары. Тэмп росту валавой прадукцыі тут склаў 102,8%. Па гэтым паказчыку лідзіравалі КСУПы “Дварэц-Агра”, “Белагурна”, ААТ “Граніт-Агра”. На 62,3% павялічылася на Дзятлаўшчыне вытворчасць прадукцыі свінагадоўлі, на 2119 асобінаў – пагалоўе свіней.

Перасягнуў планавы паказчык індэкс фізічнага аб’ёму вытворчасці прамысловай прадукцыі. Нарошчвалі аб’ёмы вытворчасці ААТ “Дзятлаўская сельгастэхніка”, “Дзятлаўскі сыраробны завод”, ТАА “Ізакам”.

Экспарт тавараў па раёне склаў 134,3% у параўнанні да аналагічнага перыяду 2018 года пры прагнозе 100,7%.

За студзень-красавік 2019 года намінальная налічаная сярэднямесячная заработная плата аднаго работніка ў галінах эканомікі складала 713 рублёў, пратэрмінаванай запазычанасці па яе выплаце не зарэгістравана.

Ірына СТЫРНІК