Выбіраю якаснае, купляю беларускае. Дзятлаўскі хлеб выпякаецца з душой

Ідуць гады, мяняюцца каштоўнасці, але і сёння самых дарагіх гасцей сустракаюць караваем. Хлеб на стале – гэта не проста прадукт, а сімвал дабрабыту, пераемнасці пакаленняў і ўпэўненасці ў заўтрашнім дні.

Дзятлаўчанам у гэтым плане пашанцавала: у райцэнтры працуе хлебны цэх Дзятлаўскага філіяла Гродзенскага аблспажыўтаварыства, які кожны дзень выпускае каля чатырох з паловай тон свежага хлеба, батонаў, булачак і іншай прадукцыі, якая карыстаецца попытам у нашым і суседніх раёнах.

Нядаўна наш фармавы хлеб “Прыазёрны”, вядомы ў народзе як “кірпічык”, быў адзначаны дыпломам за першае месца ў рэспубліканскім конкурсе якасці хлебабулачных і кандытарскіх вырабаў “Смаката”, а вітушка “Деревенская” ўдастоена гран-пры выставы “Прадэкспа-2026”. Аб прадукцыі, рабоце і калектыве хлебнага цэха расказаў начальнік аддзела прамысловасці Дзятлаўскага філіяла Сяргей Саўко:

– Наш брэнд – фармавы хлеб “Прыазёрны” складае каля 70 % усёй выпушчанай прадукцыі. Акрамя таго, выпякаем чатыры віды падавога заварнога хлеба з рознымі дабаўкамі – семачкамі сланечніка, каляндрай, сушаным часнаком і кменам. Усе яны ёсць у гандлёвай сетцы. Штодзень у цэху выпякаюць на сто кілаграмаў белага фармавога хлеба “Нежный”, які людзі называюць салдацкім. У продаж наш хлеб і іншыя вырабы паступаюць у розным выглядзе на любы густ – цэлыя або палавінкі, упакаваныя або не. Таксама ў цэху наладжаны выпуск багетаў, тоставага хлеба, лаваша з цыбуляй, усемагчымых рулетаў з начынкамі, булачак розных форм і памераў, іншага печыва. Напрыклад, самыя маленькія булачкі “Макавічкі” важаць 40 грамаў і фасуюцца па пяць штук.

Па словах Сяргея Аляксандравіча, усё хлебнае багацце ствараецца  працавітымі хлебапёкамі, якія працуюць па пяць чалавек у змену, на працягу паўсутак яны ў гарачым цэху на нагах. Каб палегчыць іх працу, у мінулым годзе былі набыты новыя цестамясільная машына і цестаакругляльнік. А яшчэ на прадпрыемстве створаны ўмовы для прыёму ежы і кароткага адпачынку персаналу ў асобным пакоі.   

Рэцэптура дзятлаўскага хлеба і хлебабулачных вырабаў проста так не раскрываецца, але ўсе мы ведаем, што самы важны іх інгрэдыент – цяпло душы і залатых рук нашых хлебапёкаў.  Каб пазнаёміцца з аўтарамі тытулаванага хлеба, адпраўляемся ў Дзятлаўскі хлебны цэх.

За тое, каб на кожным з этапаў выпуску прадукцыі ўсё працавала, як швейцарскі гадзіннік, адказвае старшы майстар Ірына Аўдзеенка. Яна прыйшла на хлебазавод у 1996 годзе звычайным пекарам пасля заканчэння прафтэхвучылішча. Стаяла каля мясільнай машыны, печы, атрымлівала практычны вопыт. Пасля заканчэння тэхнікума па профільнай спецыяльнасці яна стала працаваць майстрам змены, атрымала вышэйшую адукацыю інжынера-тэхнолага хлебапякарнай прамысловасці і прыняла на сябе абавязкі старшага майстра. Ірына Аляксандраўна лічыць, што спажыўцы любяць дзятлаўскі хлеб за яго смакавыя вартасці, натуральнасць і… душэўнасць. 

– У нас самы смачны хлеб, бо выпякаецца з душой, у добразычлівай атмасферы.  Калектыў дружны, кожны з хлебапёкаў ведае ўвесь тэхналагічны працэс, таму за ўсё бяромся разам, дапамагаем адзін аднаму, бо перажываем за вынік і якасць.

Майстар змены Ганна Вянско – зорка гэтага працоўнага калектыву. Яна ведае і ўмее ўсё, што звязана з хлебам і выпечкай, мае дзве вышэйшыя адукацыі і 15 гадоў працоўнага стажу. Пачынала звычайнай рабочай цэха, па запрашэнні кіраўніцтва філіяла год працавала начальнікам сектара якасці, але зразумела, што для яе няма нічога лепей працы ў цэху, дзе ветлівыя калегі са шчырымі ўсмешкамі і пах духмянага хлеба.

– Люблю працаваць з цестам рукамі, фармаваць булачкі – гэта заўсёды творчы працэс. З пахам хлеба і печыва прыходзіць асаблівая атмасфера, якую я не прамяняю ні на якія пасады і кабінеты.

Ганна Валер’еўна прызнаецца, што ў магазіне купляе дзятлаўскую хлебабулачную прадукцыю, а больш за ўсё любіць “кірпічык”.

Святлана Венская прыйшла на хлебазавод з кандытарскага цэха Дзятлаўскага філіяла, дзе працавала цэлае дзесяцігоддзе.

– Работу сваю вельмі люблю, там таксама падабалася, але тут больш зручны графік, – падзялілася жанчына. – Працую майстрам вытворчасці і дадаткова бяру змены пекара. Займаюся замесам цеста, выпечкай. Падабаецца, што кожную змену нешта новае, усё цікава і неаднастайна.

– Вам падабаецца дзятлаўскі хлеб?

– Вядома, вельмі люблю наш звычайны, чорны фармавы. Ён з’яўляецца візітнай карткай Дзятлаўшчыны, яго любяць і чакаюць у розных раёнах, асабліва ў Лідскім. Атрымліваем ад спажыўцоў добрыя водгукі, і гэта заўсёды прыемна.

Надыходзіць вечар, а работа ў хлебным цэху прадаўжаецца. Заданне начной змены – выпяканне батонаў, таго самага папулярнага “Прыазёрнага” хлеба, наразанне прадукцыі, упакоўка. І ўжо а пятай гадзіне раніцы наша прадукцыя адправіцца ў магазіны Дзятлаўскага, Навагрудскага, Карэліцкага, Слонімскага, Іўеўскага і Лідскага раёнаў, дзе пакупнікі чакаюць свой любімы хлеб.   

Наталля АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga  

#нашелучшее #нашалепшае  #годбелорусскойженщины 

administrator

Recent Posts

Холода не прощают беспечности

С наступлением поздней осени на первый план выходит риск возникновения пожаров и чрезвычайных ситуаций в…

5 часов ago

Ведае ўчастковы. Дайце, калі ласка, чэк

Пытанне: купляў на рынку куртку і папрасіў выдаць чэк. Прадавец сказаў, што не можа гэта…

5 часов ago

Праект “Жамчужыны зямлі Дзятлаўскай”. Таісія Сакалоўская: “Не магу сядзець без справы”

Творчы калектыў сектара нестацыянарнага абслугоўвання насельніцтва наведаў 80-гадовую юбілярку з аграгарадка Войневічы Таісію Сакалоўскую, каб…

5 часов ago

“Храму ведаў” гарпасёлка Наваельня 60 гадоў

Поўная зала сяброў, шчырыя пажаданні, цёплыя апладысменты, кранальныя ўспаміны, мілагучныя песні, памятныя падарункі – так…

18 часов ago

В Дятловском районе завершилось специальное профилактическое мероприятие «Дом без пожара»

На территории Дятловского района завершилось специальное профилактическое мероприятие «Дом без пожара», направленное на предупреждение пожаров…

18 часов ago

Тры дзесяцігоддзі, прысвечаныя людзям

У Новаяльнянскім сельскім выканаўчым камітэце на заслужаны адпачынак урачыста праводзілі кіраўніка спраў Ірыну Каспяровіч. Ірына…

19 часов ago