Вольга Кашко: “Выдатна, калі займаешся тым, што падабаецца”

Надыходзячае вясновае свята – найлепшы час нагадаць: нашы дзятлаўчанкі могуць не толькі, як у паэта, каня на скаку спыніць ды у палаючую хату ўвайсці, але нават кіраваць паспяховым бізнесам. Найлепш гэта атрымліваецца, калі правільны мужчына побач.

Для прыватнай прадпрымальніцы, кіраўніка ПГУП “БелараБуд”, якое ўжо 16 гадоў паспяхова працуе на Дзятлаўшчыне, шлях у бізнес пачаўся з імкнення дапамагчы роднаму чалавеку. Тут усё і закруцілася!..

– Ідэю распачаць бізнес па рознічным гандлі будаўнічымі, аддзелачнымі матэрыяламі і гаспадарчымі таварамі прыдумаў і пачаў рэалізоўваць мой муж Аляксандр, – расказвае Вольга Мікалаеўна. – З прапанаваных варыянтаў у цэнтры горада выбралі месца і пабудавалі свой першы магазін “МастерОК”. Пачыналі раскручвацца з невялікага асартыменту – фарбы, шпалеры, дзверы. Ездзілі на заводы-вытворцы дамаўляцца, вялі ўлік. Штат быў малы, таму часам самі дапамагалі прадаўцам, каб даць людзям выхадныя. Паступова “разрасталіся”, і ўсе сродкі ўкладвалі ў далейшае развіццё. Сёлета спаўняецца дзесяць гадоў, як быў адкрыты наш другі магазін “Практык” на выездзе з горада, удвая большы па плошчы, што дазволіла нам істотна пашырыць асартымент і наладзіць адгрузкі з камфортам для сябе і кліентаў. Набылі праз аўкцыён памяшканне, зрабілі яго рэстаўрацыю, пашырылі штат і дагэтуль працуем.   

– Якім шляхам прыйшлі ў бізнес вы самі?

– Наша сямейная справа паспяхова працавала, расла і заканамерна, што ў адзін момант прадпрыемству спатрэбіўся адміністратар, каб весці перагаворы і ажыццяўляць цэнтралізаваны кантроль за дзейнасцю бізнесу. Я па адукацыі банкаўскі работнік і на той час ужо мела 16 гадоў стажу ў раённым аддзяленні “Белаграпрамбанка”. Было складана рашыцца пакінуць усё гэта, але ўрэшце выбрала сямейную справу і ніколі не пашкадавала аб такім рашэнні.

– Які рэжым работы ў сучаснай прадпрымальніцы?

– Часцей за ўсё работа пазапланавая: загадзя немагчыма спрагназаваць, чым і калі скончыцца рабочы дзень. Я не магу сабе дазволіць адпачываць, калі кліент чакае хуткага выканання заказу або патрэбны мой удзел у бягучых справах. Ніколі раней не думала, што, працуючы на сябе, давядзецца браць работу на дом, але часам здараецца і так. З другога боку, калі паток кліентаў крыху меншы ў міжсезонне або святочныя дні, мы нават можам засумаваць па актыўным рытме жыцця, да якога прывыклі, калі гатовы працаваць 24 на 7.

– Хто цяпер працуе ў вашай кампаніі?

– Штат ПГУП “БелараБуд” складае 11 чалавек, з якіх два бухгалтары, адзін падсобны рабочы і прадаўцы-кансультанты. Нягледзячы на тое, што сфера нашай дзейнасці – будаўніцтва, калектыў пераважна жаночы. “Цякучкі” ў нас практычна няма, многія працуюць ужо 10 гадоў і больш, мы даўно як сям’я. Я імкнуся стварыць добры клімат на рабоце і забяспечыць дастойны заробак, на што калегі адказваюць стараннасцю і шчырым перажываннем за агульную справу. Бо мы, жанчыны, сапраўдныя беларусачкі: трымаемся адна за адну, разам можам горы зрушыць.

– Хто галоўны ў бізнесе, а хто дома? Ці хапае часу на падтрыманне сямейнага ачага?

– Мы з мужам па жыцці ва ўсіх справах побач, разам вядзём сямейны бізнес, ніколі не разглядала сябе ў гэтай сферы без яго непасрэднага ўдзелу. Клопат пра хатнія справы, прыгатаванне вячэры, паўсядзённы быт я бяру на сябе, бо муж часта затрымліваецца на рабоце яшчэ даўжэй, чым я.  Як і ўсе людзі, народжаныя ў СССР, для душы і па звычцы штогод саджу агарод, парнік, раблю закруткі на зіму з садавіны і агародніны. Дочкі ўжо дарослыя, разляцеліся з бацькоўскага дома, а мы з мужам засталіся адзін у аднаго. Пакуль хапае сіл і здароўя, разам клапоцімся пра свой вялікі ўтульны дом, дзе заўсёды знойдзецца работа на ўчастку, займаемся фізічнай актыўнасцю, трымаем сябе ў тонусе.

– Што дастаўляе вам радасць у жыцці?

– Выдатна, калі займаешся тым, што падабаецца, гэта правільна. Сапраўднае задавальненне атрымліваю ад паўсядзённых спраў, размоваў з пакупнікамі. Шаснаццаць гадоў вопыту дазваляюць не толькі разумець, а нават папярэджваць запыты кліентаў, і гэта дастаўляе сапраўдную асалоду. Радуюся, калі ўсё атрымліваецца, як запланавана, калі сям’я і работнікі кампаніі ў добрым настроі, тады і работа ладзіцца спраўна.

– Чаго б хацелі пажадаць свайму калектыву з нагоды Міжнароднага жаночага дня?

– Шчыра жадаю ўсім цудоўным дзяўчатам нашай дружнай каманды моцнага здароўя, удачы, дабрабыту, жаночага шчасця, няхай дзеці радуюць. Яшчэ зычу ўсім заставацца поўнымі сіл і бадзёрымі на доўгія гады. 

Наталля АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашалепшае #нашелучшее #экономика #предприниматель

administrator

Recent Posts

Холода не прощают беспечности

С наступлением поздней осени на первый план выходит риск возникновения пожаров и чрезвычайных ситуаций в…

8 часов ago

Ведае ўчастковы. Дайце, калі ласка, чэк

Пытанне: купляў на рынку куртку і папрасіў выдаць чэк. Прадавец сказаў, што не можа гэта…

8 часов ago

Праект “Жамчужыны зямлі Дзятлаўскай”. Таісія Сакалоўская: “Не магу сядзець без справы”

Творчы калектыў сектара нестацыянарнага абслугоўвання насельніцтва наведаў 80-гадовую юбілярку з аграгарадка Войневічы Таісію Сакалоўскую, каб…

8 часов ago

“Храму ведаў” гарпасёлка Наваельня 60 гадоў

Поўная зала сяброў, шчырыя пажаданні, цёплыя апладысменты, кранальныя ўспаміны, мілагучныя песні, памятныя падарункі – так…

21 час ago

В Дятловском районе завершилось специальное профилактическое мероприятие «Дом без пожара»

На территории Дятловского района завершилось специальное профилактическое мероприятие «Дом без пожара», направленное на предупреждение пожаров…

21 час ago

Тры дзесяцігоддзі, прысвечаныя людзям

У Новаяльнянскім сельскім выканаўчым камітэце на заслужаны адпачынак урачыста праводзілі кіраўніка спраў Ірыну Каспяровіч. Ірына…

22 часа ago