У Дзятлаве новы ксёндз-пробашч, знаёмцеся

Пробашчам касцёла Унебаўзяцця Найсвяцейшай Панны Марыі ў Дзятлаве прызначаны ксёндз Віталій Пяткевіч, які да гэтага амаль тры гады служыў у адной з духоўных жамчужын Гродзеншчыны – касцёле Святога Мікалая ў Геранёнах Іўеўскага раёна.

Родам ён з горада Ашмяны, дзе скончыў школу з музычным ухілам і натхніўся на важны духоўны выбар, дзякуючы прыкладу каталіцкага святара Яна Пузыны, які цяпер з’яўляецца настаяцелем душапастырства Бернардзінскага касцёла Узвышэння Святога Крыжа ў горадзе Гродне.

Віталій Пяткевіч скончыў Гродзенскую вышэйшую міждыяцэзіяльную духоўную семінарыю, святарскае пасвячэнне 27 чэрвеня 2015 года атрымаў ад біскупа Гродзенскага Аляксандра Кашкевіча ў касцёле Францішка Ксаверыя ў горадзе над Нёманам.

Як зазначае сам Віталій Пяткевіч, за дванаццаць гадоў, колькі доўжыцца яго прафесійнае служэнне Богу, у жыцці было нямала цікавых супадзенняў. Падобныя выпадкі веруючыя людзі называюць Божым промыслам. Так, у Гродзенскай семінарыі над імі, першакурснікамі, на працягу года апекаваўся і знаёміў з вучэбнымі патрабаваннямі і правіламі ўстановы тагачасны старшакурснік Андрэй Лішко, якога цяпер змяніў у касцёле Унебаўзяцця Найсвяцейшай Панны Марыі ў Дзятлаве ксёндз Віталій. Першым прыходам, дзе малады чалавек пачынаў святарскую дзейнасць пасля семінарыі, стаў касцёл Узвышэння Святога Крыжа: там сёння служыць яго галоўны настаўнік Ян Пузына, а сам Віталій затрымаўся амаль на тры гады.

Глыбокі след у сэрцы пачынаючага святара пакінулі два ксяндзы Антоніі з абсалютна супрацьлеглай методыкай перадачы духоўнага вопыту маладым калегам. Антоній Ханка, які сустрэў яго на першым прыходзе ў Гродне, уласным прыкладам навучыў з пашанай і разуменнем адносіцца да людзей, незалежна ад іх статусу і ўзросту. Пасля службаў ён заўжды запрашаў Віталія Пяткевіча на кубачак кавы, якую нязменна варыў сам – менавіта ў такім фармаце праходзілі настаўніцкія размовы-павучэнні з маладым святаром і прывіваўся вопыт пабудовы пропаведзяў, узаемадзеяння з прыхаджанамі.

Антонія Філіпчыка з 43-гадовым стажам служэння Богу, поруч з якім Віталій Пяткевіч пяць гадоў правёў у Ваўкавыскім касцёле Святога Вацлава, многія лічылі суровым духаўніком за яго патрабавальнасць, а малады святар убачыў у ім строгага бацьку, які імкнецца зберагчы сваё духоўнае дзіця ад сур’ёзных памылак, сфарміраваць волю, навучыць унутранай дысцыпліне, бо святарства – гэта воінства Божае. Галоўны багаж ведаў і духоўнага вопыту малады святар атрымаў менавіта ад гэтых мудрых людзей, якія аддалі сваё жыццё служэнню Богу.

Нядоўгі час (сем месяцаў) у перапынку паміж “ваўкавыскім перыядам” Віталій Пяткевіч быў замацаваны за Лідскім касцёлам Святой Сям’і.

Затым стаў 41 святаром 507-гадовага касцёла Святога Мікалая ў Геранёнах, дзе ксяндзу-пробашчу даводзілася весці вельмі актыўнае жыццё, бо, акрамя набажэнстваў, яшчэ знаёміў са старажытным храмам, яго архітэктурай і гісторыяй паломнікаў і турыстаў. Касцёл у Геранёнах уваходзіць у “Залатое кальцо Іўеўшчыны”. Як прызнаецца святар, той час назаўжды застанецца ў памяці як самы інтэнсіўны перыяд дзейнасці за дванаццацігоддзе.        

Да прызначэння ксяндзом-пробашчам у Дзятлава Віталій Пяткевіч толькі аднойчы праездам быў у нашым горадзе, таму цяпер паступова знаёміцца з мясцовасцю, жыхарамі, прыхаджанамі, традыцыямі касцёла Унебаўзяцця Найсвяцейшай Панны Марыі.

– Не скажу, што атрымаўшы звестку аб новым месцы служэння быў здзіўлены, узрадаваны ці засмучаны, – прызнаецца ксёндз Віталій. – Проста прыняў усё, як магчымасць новага вопыту. Касцёл і прыход у Дзятлаве большыя, чым у Геранёнах, таму адчувальна больш тут будзе ўсяго. Планую паступова асвоіцца, пра ўсё даведацца, падтрымліваць лепшыя традыцыі і рухацца наперад. Спадзяюся і ўпэўнены, што з грунтоўнай падтрымкай вернікаў і мясцовых жыхароў усё ўдасца.

Ксёндз Віталій Пяткевіч – аптыміст, ён ідзе па жыцці з цвёрдай ўпэўненасцю, што на свеце няма кепскіх людзей, бо кожны з нас створаны па вобразе і падабенстве Божым. У чалавека бываюць толькі кепскія ўчынкі, а над імі трэба працаваць, і гэта адно з галоўных прызначэнняў святарства – ухіляць вернікаў ад граху, весці іх да Бога.

– Я ўдзячны Госпаду, што ўсе гэтыя падзеі, людзі, залатыя гады семінарыі, важныя ўрокі жыцця сустрэліся на маім шляху, – зазначае Віталій Пяткевіч.

Пажадаем новаму ксяндзу-пробашчу, каб і надалей гэта яго ўпэўненасць толькі мацнела, Бог вёў па правільным шляху, вера сагравала, а горад Дзятлава стаў яшчэ адным месцам, якое асацыіруецца з домам, пазітыўнымі эмоцыямі, цікавымі падзеямі і добрымі людзьмі. 

Ірына СТЫРНІК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашелучшее #нашалепшае 

administrator

Recent Posts

Холода не прощают беспечности

С наступлением поздней осени на первый план выходит риск возникновения пожаров и чрезвычайных ситуаций в…

8 часов ago

Ведае ўчастковы. Дайце, калі ласка, чэк

Пытанне: купляў на рынку куртку і папрасіў выдаць чэк. Прадавец сказаў, што не можа гэта…

8 часов ago

Праект “Жамчужыны зямлі Дзятлаўскай”. Таісія Сакалоўская: “Не магу сядзець без справы”

Творчы калектыў сектара нестацыянарнага абслугоўвання насельніцтва наведаў 80-гадовую юбілярку з аграгарадка Войневічы Таісію Сакалоўскую, каб…

8 часов ago

“Храму ведаў” гарпасёлка Наваельня 60 гадоў

Поўная зала сяброў, шчырыя пажаданні, цёплыя апладысменты, кранальныя ўспаміны, мілагучныя песні, памятныя падарункі – так…

21 час ago

В Дятловском районе завершилось специальное профилактическое мероприятие «Дом без пожара»

На территории Дятловского района завершилось специальное профилактическое мероприятие «Дом без пожара», направленное на предупреждение пожаров…

21 час ago

Тры дзесяцігоддзі, прысвечаныя людзям

У Новаяльнянскім сельскім выканаўчым камітэце на заслужаны адпачынак урачыста праводзілі кіраўніка спраў Ірыну Каспяровіч. Ірына…

22 часа ago