Супрацоўнікі міжраённага аддзела ДАІ Слонімскага РАУС сумесна з Транспартнай інспекцыяй горада Ліды, а таксама карэспандэнтам газеты “Перамога” праводзілі комплексную праверку школьных аўтобусаў, якія належаць Дзятлаўскаму раённаму цэнтру па забеспячэнні дзейнасці бюджэтных і іншых арганізацый.
Пры праверцы гатоўнасці транспарту да новага навучальнага года асаблівую ўвагу спецыялісты звярталі на тэхнічны стан аўтобусаў, наяўнасць у іх рамянёў бяспекі, вогнетушыцеляў і аптэчкі з няскончаным тэрмінам прыдатнасці, страхоўкі і пройдзенага тэхагляду. Кожны транспартны сродак павінен быць пазначаны таблічкай “Дзеці”. Цікавілі правяраючых допускі вадзіцеляў да кіравання, адпаведнасць катэгорыі і ці пройдзена навучанне.
З вадзіцелямі быў праведзены інструктаж, а таксама прыняты залікі па веданні правілаў дарожнага руху, з якімі яны паспяхова справіліся.
У час маніторынгу істотных недахопаў выяўлена не было. Усе аўтобусы дапушчаны да перавозу дзяцей.
Інспектары пажадалі вадзіцелям бяспечных паездак і нагадалі быць вельмі ўважлівымі і адказнымі ў час руху.
Святлана ГРЫШЫНА
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
