Прышчэпка з дастаўкай на работу

На Дзятлаўшчыне прадаўжаецца кампанія па імунізацыі насельніцтва супраць віруса грыпу.

Да яе далучыліся супрацоўнікі райвыканкама, якія скарысталіся магчымасцю зрабіць прышчэпку на сваім рабочым месцы. 

Агляд доктара-тэрапеўта, вымярэнне тэмпературы, сатурацыі, ціску, само ўвядзенне вакцыны і наступны кантроль самаадчування займаюць некалькі хвілін. Працэдура простая і нядоўгая, але неабходная. Гэта разумеюць усе, хто клапоціцца пра здароўе.

Сваім меркаваннем, чаму важна вакцынавацца ад грыпу, падзяліліся тыя, хто зрабіў прышчэпку.

Вадзім Бялятка, намеснік старшыні райвыканкама:

– Восень – час прышчэпкавай кампаніі, на Дзятлаўшчыне яна прадаўжаецца ўжо два тыдні. Сёння вакцынуецца калектыў райвыканкама. Асабіста я падтрымліваю такую добрую ініцыятыву, лічу, што своечасовая прышчэпка дапамагае спрафілактаваць інфекцыйныя захворванні, такім чынам зверагчы сваё здароўе. З другога боку, вакцынацыя ўплывае на грамадскую бяспеку. Запрашаю жыхароў раёна далучацца да імунізацыі ад грыпу.

Яўгенія Ярмаловіч, галоўны спецыяліст аддзела архітэктуры і будаўніцтва райвыканкама:

– Кожны год да пачатку сезона прастуд прышчапляюся ад грыпу сама і раблю вакцынацыю дзецям. Дзякуючы гэтаму атрымліваецца падтрымаць імунітэт і не хварэць, а калі бывае прастуда, то ў лёгкай форме. Вельмі прыемна і зручна, што зрабіць вакцынацыю можна без наведвання паліклінікі.

Адзначым, што магчымасцю прышчапіцца ад грыпу, не пакідаючы рабочае месца, могуць скарыстацца працоўныя калектывы Дзятлаўшчыны. Для гэтага трэба папярэдне пакінуць заяўку ў раённай паліклініцы. Жыхары раёна таксама могуць вакцынавацца, наведаўшы ўстанову аховы здароўя.

Наталля АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашелучшее #нашалепшае