Прафсаюзная работа. Размова аб правах і адказнасці

На базе Цэнтра банкаўскіх паслуг № 422 ААТ “Белаграпрамбанк” у горадзе Дзятлаве прайшоў прававы прафсаюзны прыём грамадзян і прававая асвета па тлумачэнні працоўнага заканадаўства, якое рэгулюе сферу працоўных і іншых звязаных з імі адносінаў.

Яго правялі прававы інспектар працы Гродзенскай абласной арганізацыі банкаўска-фінансавага прафсаюза Ларыса Мялешка і пракурор Дзятлаўскага раёна Віталій Юрго.

– Сёння размова пойдзе на актуальную і няпростую тэму – прыцягненне да дысцыплінарнай адказнасці, – адзначыла Ларыса Васільеўна.

Яна расказала пра тое, якія пацвярджэнні падобных фактаў павінны збірацца наймальнікам, спынілася на парадку прызначэння пакарання і выпадках, у якіх патрабуецца ўдзел прафсаюза або ён неабавязковы.

– Работнік арганізацыі, член прафсаюза, які лічыць, што парушаюцца яго правы, можа звярнуцца па дапамогу да юрыстаў свайго прафсаюза і атрымаць дапамогу, – дадала Ларыса Мялешка.

Віталій Юрго ў выступленні звярнуўся да тэмы генацыду беларускага народа ў часы Вялікай Айчыннай вайны і расследавання яго фактаў на Дзятлаўшчыне.

– Прадаўжаем расследаванне крымінальнай справы і апытанне сведкаў. Сёлета правядзём раскопкі ў вёсцы Чырвоны Бор, дзе меркавана пахаваны два або тры мірныя жыхары, якія загінулі ў час вайны. Таксама былі адкрыты дагэтуль невядомыя факты аб спальванні хутароў каля вёсак Клішавічы, Ахонава і Галаўлі. Вынікам такой работы становіцца адкрыццё новых імёнаў загінулых, якія дадаюцца на помніках і мемарыялах. 

Акрамя таго, Віталій Станіслававіч завяродзіў увагу на барацьбе з кібермахлярствам. Нягледзячы на пастаяннае інфармаванне насельніцтва гэта тэма застаецца вострай, кожны дзень у органы правапарадку паступаюць па два-тры адпаведныя звароты. Толькі ў гэтым годзе на Дзятлаўшчыне зафіксаваны факты, калі пацярпелыя аддалі махлярам звыш 60 тысяч рублёў, у тым ліку, узяўшы крэдыты ў розных банках.

На прыём звярнуліся работнікі Цэнтра банкаўскіх паслуг з пытаннямі, ці выплачваюцца камандзіровачныя, калі курсы павышэння кваліфікацыі праходзяць у выхадныя дні; ці абавязаны наймальнік працаўладкоўваць студэнта на час праходжання вытворчай практыкі; хто прымае рашэнне аб прадаўжэнні працоўных адносінаў з работнікамі, якія дасягнулі пенсійнага ўзросту. На іх былі дадзены адказы ў час прыёму.

Аналагічная сустрэча прайшла ў памяшканні райвыканкама сумесна са старшынёй Дзятлаўскай раённай арганізацыі Беларускага прафсаюза работнікаў дзяржаўных і іншых установаў Святланай Залучан.

Наталля АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашелучшее #нашалепшае