У Год беларускай жанчыны рэдакцыя газеты “Перамога” прадаўжае работу над праектам “Жамчужыны зямлі Дзятлаўскай”. Ён прысвечаны нашым лепшым зямлячкам, якія рэалізавалі сябе ў прафесіі, сямейным жыцці, як лідары, спартсмены, майстрыхі або творчыя асобы. На гэты раз у аб’ектыве – жанчына-прафесіянал, якая аддала любімай справе больш за 50 гадоў жыцця, шчырая, кранальная, з добрым сэрцам, адкрытым для людзей. Гэта загадчыца аптэкі № 62 гарадскога пасёлка Казлоўшчына Ларыса Бялятка.
1 красавіка яна прымала цёплыя віншаванні з юбілейным днём нараджэння ад загадчыцы цэнтральнай раённай аптэкі № 55 Дзятлаўскага раёна Гродзенскага РУП “Фармацыя” Лідзіі Баравік.
– З цудоўнай датай вас, Ларыса Аляксандраўна, з 70-годдзем, – звярнулася да юбіляркі кіраўнік аптэчнай сеткі раёна. – Поруч з вамі ў прафесіі мы прайшлі доўгі шлях, на якім былі не толькі радасці, але і цяжкасці, аднак я заўжды ўпэўнена ў выніковай рабоце вашай аптэкі, бо вы мудры кіраўнік. Ведаю, як любіце сваіх дзяцей і ўнукаў, пасёлак Казлоўшчыну, людзей. Жыхары таксама да вас цёпла адносяцца і жадаюць як мага даўжэй бачыць на працоўным месцы. Вы цудоўная жанчына, майстар аптэчнай справы, таму былі настаўнікам для многіх маладых спецыялістаў. Да іх адносіцеся заўжды па-мацярынску. Дзякуй вам за аўтарытэт аптэкі, працу і прафесіяналізм. Доўгіх гадоў жыцця, поспехаў і дай вам Бог такой жа цёплай любові ад навакольных, якую самі несяце людзям.
Лідзія Баравік уручыла імянінніцы кветкі і падарункі ад калег.
Да шчырых пажаданняў далучылася малады спецыяліст фармацэўт-рэцэптар Алеся Пяткевіч, якая цяпер працуе разам з Ларысай Аляксандраўнай і вучыцца ў яе прафесійнаму майстэрству.
Пачынаючым спецыялістам шанцуе, калі ім сустракаецца такі настаўнік. Ларыса Бялятка – прафесіянал аптэчнай справы, “Выдатнік аховы здароўя Рэспублікі Беларусь”. За гады працы яна адзначана шматлікімі ўзнагародамі, а аптэка № 62 гарадскога пасёлка Казлоўшчына пад яе кіраўніцтвам неаднаразова прызнавалася лепшай на Гродзеншчыне ў сваёй падгрупе.
Нарадзілася наша зямлячка ў вёсцы Талявічы ў сям’і сялян. Яе бацькі цяжка працавалі ў калгасе, таму марылі даць дзецям адукацыю і прэстыжныя прафесіі. Для дачкі Ларысы, якая была выдатніцай у вучобе, выбралі аптэчную справу, бо вельмі ім падабалася тагачасная работніца аптэкі Алена Пятрушкевіч. Так, у 1974 годзе Ларыса скончыла фармацэўтычнае аддзяленне Магілёўскага медыцынскага вучылішча. Працоўную дзейнасць пачынала ў гарадскім пасёлку Наваельня. Адтуль праз месяц была пераведзена ў Казлоўшчыну, па сямейных абставінах некаторы час была аптэкарам на Лідчыне, вярнулася і ўжо пяць дзесяцігоддзяў працуе ў аптэцы № 62, з 1982 года з’яўляецца яе загадчыцай.
Паўвекавы працоўны шлях не быў гладкім для Ларысы Аляксандраўны, асабліва складана было ў 90-х гадах, калі ў эканоміцы наспеў крызіс, распаўся Савецкі Саюз. У той час многія гаспадарчыя справы, якія тычыліся работы аптэкі, даводзілася вырашаць самастойна, нярэдка надзейнае плячо падстаўляў муж Аляксандр Яўгеньевіч. Дзякуючы яму, падтрымцы землякоў і калег, удалося дастойна перажыць няпросты перыяд. Не менш хвалюючым быў этап камп’ютарызацыі і ўкаранення лічбавых тэхналогій. Ларыса Аляксандраўна перажывала, што ніколі не асвоіць камп’ютар, аднак справілася і з гэтай няпростай задачай, цяпер не горш за маладых работнікаў “сябруе” з тэхнікай.
Лідзія Баравік расказала, што цэніць юбілярку не толькі як стараннага, паспяховага і прынцыповага кіраўніка, але і як чалавека з адкрытай душой, здольнага суперажываць людзям, падбадзёрваць іх добрым словам, карыснай парадай, неабыякавымі адносінамі.
– За гэту аптэку я заўжды спакойная, тут пануе ідэальны парадак, не бывае скаргаў – толькі падзякі, хаця ўстанова абслугоўвае не толькі мясцовае насельніцтва, але і сацыяльны пансіянат “Колас”, –падкрэслівае Лідзія Баравік.
Падтрымліваюць сувязь з Ларысай Аляксандраўнай і ўдзячны ёй ранейшыя маладыя спецыялісты, якіх яна “ўзрасціла” ў прафесіі, шчодра дорачы веды, любоў, дапамогу.
Ларыса Бялятка знайшла сваё шчасце не толькі ў рабоце, але і ў жыцці. Разам з мужам выгадавалі дваіх дзяцей. Сёння Ларыса Бялятка яшчэ і шчаслівая бабуля пяці ўнукаў, двое з якіх выбралі блізкую да бабулінай справы медыцынскую прафесію. Нядаўна ўнучка Кацярына Бялятка, якая працуе доктарам-гінеколагам у трэцяй гарадской клінічнай бальніцы ў Мінску, парадавала перамогай у прафесійным конкурсе і званнем “Лепшы малады спецыяліст”. Ларыса Аляксандраўна чалавек энергічны і працавіты, яна не ўмее сядзець без работы: дома вырошчвае кветкі, даглядае агарод, упрыгожвае ўчастак, любіць сустракацца з блізкімі і сябрамі. У яе вялікім сэрцы ёсць месца для кожнага, хто прыходзіць з дабром, нездарма і моладзь яна вучыць галоўнаму – шанаваць і паважаць людзей.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#нашелучшее #нашалепшае #годбелорусскойженщины
