Падроблены праект

У студзені 2017 года пракуратурай Слонімскага раёна на падставе матэрыялаў праверкі фінансавай міліцыі ўзбуджана крымінальная справа па артыкулу 426 (частка 2) Крымінальнага кодэкса Рэспублікі Беларусь (“Перавышэнне ўлады ці службовых паўнамоцтваў”) у дачыненні службовай асобы аднаго з дзяржаўных прадпрыемстваў горада Слоніма, якое ажыццяўляе дзейнасць у сферы капітальнага будаўніцтва.

У снежні 2016 года названы работнік з мэтаю асваення выдаткаваных бюджэтных сродкаў на выкананне будаўнічых работ падрабіў камплект праектных дакументаў ад імя іншай дзяржаўнай арганізацыі, якая ўпаўнаважана на складанне такой дакументацыі і мае сертыфікат адпаведнасці. Сутнасць падробкі была ў тым, што ў якасці асновы быў узяты макет праўдзівага дакумента, а рэквізіты ў выглядзе афіцыйных подпісаў упаўнаважаных службовых асобаў і пячаткі арганізацыі былі віртуозна перанесены на падробныя дакументы з дапамогаю каляровай капіравальнай тэхнікі.

Надалей названыя дакументы былі пададзены ў органы дзяржаўнага казначэйства і на іх падставе былі пералічаны грашовыя сродкі ў суме звыш 4100 дэнамінаваных рублёў. У выніку бюджэтныя грошы былі выкарыстаны неабгрунтавана, гэта значыць на падставе падробленых дакументаў. Былі падарваны карпаратыўныя сувязі паміж дзяржарганізацыямі. Пацярпела рэпутацыя кіраўніка адной з арганізацый.

А ў сутнасці парушэння належыць разабрацца і вынесці канчатковае рашэнне следчым органам, куды крымінальная справа перададзена для далейшага расследавання.

С. ТУПТАЛА,
начальнік Слонімскага МА УДФР КДК Рэспублікі Беларусь па Гродзенскай вобласці