Падаткаабкладанне: пытанні і адказы

На пытанні, якія паступілі ў час “Прамой лініі”, адказала намеснік начальніка інспекцыі Міністэрства па падатках і зборах Рэспублікі Беларусь па Дзятлаўскім раёне Таццяна Генадзьеўна Касцюкевіч.

Пытанне: якую сістэму падаткаабкладання можна прымяніць да атрыманай выручкі, калі планую ажыццяўляць рознічны гандаль праз інтэрнэт-магазін?

Адказ: з 2016 года не маюць права прымяняць спрошчаную сістэму падаткаабкладання арганізацыі і індывідуальныя прадпрымальнікі, якія ажыццяўляюць рознічны гандаль праз інтэрнэт-магазін. Інтэрнэт-магазін – гэта інфармацыйны рэсурс суб’екта гандлю ў глабальнай камп’ютарнай сетцы Інтэрнэт, які дазваляе ажыццявіць заказ на набыццё або выбар і набыццё тавараў без (па-за) гандлёвага аб’екта. Арганізацыі і індывідуальныя прадпрымальнікі лічацца, што яны ажыццяўляюць гандаль праз інтэрнэт-магазін з даты ўключэння звестак аб іх інтэрнэт-магазіне ў Гандлёвы рэестр Рэспублікі Беларусь па дату выключэння гэтых звестак з указанага рэестра (уключна). Такім чынам, суб’екты, якія ажыццяўляюць рознічны гандаль праз інтэрнэт-магазін, абавязаны з 1 студзеня 2016 года прымяняць агульны парадак уплаты падаткаў.

Пытанне: ці абавязаны я, з’яўляючыся плацельшчыкам адзінага падатку з індывідуальных прадпрымальнікаў, афармляць кожную гаспадарчую аперацыю першасным уліковым дакументам?

Адказ: з 2016 года індывідуальныя прадпрымальнікі, якія плацяць адзіны падатак, абавязаны складаць першасныя уліковыя дакументы па правілах, устаноўленых заканадаўствам для індывідуальных прадпрымальнікаў, якія вядуць улік даходаў і расходаў. Парадак складання першасных уліковых дакументаў рэгламентуецца пунктамі 4-8 Інструкцыі аб парадку вядзення ўліку даходаў і расходаў індывідуальнымі прадпрымальнікамі (натарыусамі, якія ажыццяўляюць натарыяльную дзейнасць у натарыяльным бюро, адвакатамі, якія ажыццяўляюць адвакацкую дзейнасць індывідуальна), зацверджанай пастановай Міністэрства па падатках і зборах Рэспублікі Беларусь ад 24.12.2014 №42.

Пытанне: у 2015 годзе арганізацыя прымяняла стаўку падатку пры спрошчанай сістэме падаткаабкладання ў памеры 3% без уплаты падатку на дабаўленую вартасць у адносінах да выручкі ад рэалізацыі ў рознічным гандлі набытых тавараў, якія змены адбыліся ў 2016 годзе?

Адказ: з 1 студзеня 2016 года адменена стаўка падатку пры спрошчанай сістэме падаткаабкладання ў памеры 3% без уплаты падатку на дабаўленую вартасць, якая прымяняецца ў адносінах да выручкі ад рэалізацыі ў рознічным гандлі набытых тавараў. Прадпрыемствы, якія ажыццяўляюць рознічны гандаль набытымі таварамі, абавязаны плаціць падатак пры спрошчанай сістэме або па стаўцы 5% без уплаты падатку на дабаўленую вартасць або па стаўцы 3% з уплатай падатку на дабаўленую вартасць.

Пытанне: хто і ў якіх выпадках складае і накіроўвае электронныя рахункі-фактуры?

Адказ: рахункі-фактуры – гэта электронныя дакументы (далей — ЭРФ), гэта значыць дакументы, створаныя толькі ў электронным выглядзе, без выкарыстання папяровых носьбітаў. Прадаўцы пры заключэнні здзелак афармляюць рахункі-фактуры, каб пацвердзіць факт вылічэння падатку на дабаўленую вартасць і перадаюць іх пакупнікам. Пакупнікі на падставе атрыманых рахункаў-фактураў прымаюць да выліку сумы падатку, указаныя ў іх. Электронны дакументаабарот ЭРФ будзе ажыццяўляцца праз Партал электронных рахункаў-фактураў Міністэрства па падатках і зборах Рэспублікі Беларусь. Такім чынам, указаны дакумент прымяняецца  на дадзеным этапе толькі для разлікаў па падатку на дабаўленую вартасць паміж прадаўцом і пакупніком і прыняцця да выліку адпаведных сумаў падатку. Укараненне электроннага рахунка-фактуры на тэрыторыі рэспублікі плануецца з 1 ліпеня 2016 года.

Пытанне: якія звесткі ў адносінах да фізічных асобаў абавязана падаваць у падатковы орган нарыхтоўчая арганізацыя?

Адказ: з 2016 года нарыхтоўчыя арганізацыі спажывецкай кааперацыі, іншыя арганізацыі, індывідуальныя прадпрымальнікі абавязаны падаваць у падатковыя органы па месцы пастаноўкі на ўлік звесткі аб выплаце на тэрыторыі Рэспублікі Беларусь даходаў фізічным асобам за набываемую ў іх прадукцыю раслінаводства без уплаты падаходнага падатку, калі памер даходу больш за 20 мільёнаў рублёў у дзень. Такія даходы вызваляюцца ад падаткаабкладання без прадастаўлення фізічнай асобай такім арганізацыям, індывідуальным прадпрымальнікам даведкі мясцовага выканаўчага і распарадчага органа, якая пацвярджае, што рэалізуемая прадукцыя выраблена ім на зямельным участку, які знаходзіцца на тэрыторыі Рэспублікі Беларусь і прадастаўленым плацельшчыку для будаўніцтва і абслугоўвання жылога дома, вядзення асабістай падсобнай гаспадаркі, калектыўнага садоўніцтва, дачнага будаўніцтва, агародніцтва, у выглядзе службовага зямельнага надзелу.

Падрыхтавала да друку С. ГРЫШЫНА