У палёце да новых вышыняў

У сярэдняй школе № 1 горада Дзятлава прайшоў раённы этап рэспубліканскай ваенна-патрыятычнай гульні “Арляня”.

За званне мацнейшых сёлета пазмагаліся восем каманд.

Начальнік мабілізацыйнай групы ваеннага камісарыята Дзятлаўскага раёна Аляксандр Бургун павітаў удзельнікаў мерапрыемства, пажадаў усім камандам поспехаў, сумленнай барацьбы і волі да перамогі.

Паказаць спрыт, дасціпнасць, трапнасць, сілу, сабранасць і камандную падрыхтоўку “арлянятам” належала ў час конкурсных іспытаў.

Сёлета надвор’е ўнесла свае карэктывы ў праграму спаборніцтваў, таму ваенізаваную эстафету “Час каманды” падзялілі на некалькі этапаў – камплектаванне рэчмяшкоў, зборку і разборку аўтамата, медыцынскую падрыхтоўку.

У ваенна-спартыўным конкурсе “Мужнасць! Адвага! Гонар!” хлопцы і дзяўчаты выконвалі сілавыя практыкаванні. Таксама ўдзельнікі “Арляняці” стралялі з пнеўматычнай вінтоўкі, дэманстравалі страявую падрыхтоўку, адказвалі на пытанні ў інтэлектуальным квіз-турніры “Памятаем аб мінулым, ганарымся сучасным, думаем пра будучыню!”. На ваенна-патрыятычную гульню навучэнцы падрыхтавалі відэавізітоўкі “Час моладзі”, намалявалі баявыя лісткі. Усё гэта ацэньвала кампетэнтнае журы.

Па выніках усіх этапаў пераможцай ваенна-патрыятычнай гульні “Арляня” стала каманда сярэдняй школы № 3 горада Дзятлава, другое месца ў навучэнцаў Гезгалаўскай сярэдняй школы, трэцяе падзялілі каманды гімназіі № 1 горада Дзятлава і Хвінявіцкай сярэдняй школы.

Віншуем пераможцаў! Уладальнікі 1-га месца прадставяць Дзятлаўшчыну на абласным этапе конкурсу.

Наталля АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga