У індустрыяльным парку “Вялікі камень” з 4 па 9 чэрвеня працуе 34-я Міжнародная спецыялізаваная выстава “Белагра-2024”, якая традыцыйна праходзіць у рамках Беларускага аграпрамысловага тыдня.
Мерапрыемства наведалі прадстаўнікі раённай улады і кіраўнікі сельгаспрадпрыемстваў Дзятлаўшчыны. Аб тым, як прайшла паездка, расказаў першы намеснік старшыні райвыканкама – начальнік упраўлення сельскай гаспадаркі і харчавання Віталій Шулейка:
– Выстава “Белагра-2024”, як заўжды, прыемна ўразіла: шмат карыснай інфармацыі, інавацый, пазітыўных уражанняў, многа тэхнікі, цікавых навінак. Кіраўнікі гаспадарак нашага раёна не проста прыглядваліся да мадэляў, якія іх зацікавілі, але і правялі плённыя перагаворы аб папаўненні машынна-трактарнага парку прадпрыемстваў. У бліжэйшы час чакаюцца выпрабаванні новых мадэляў на базе Дзятлаўскага раёна: будзем асвойваць бессцярнёвую тэхналогію пасеву “No-Till”. Дзякуючы заключаным дамоўленасцям стане магчымым у бліжэйшы час набыць для ААТ “Дварэц-Агра” сучасную касілку-плюшчылку “КПР-9”. Надзвычай цікава на выставе была прадстаўлена меліярацыйная тэхніка, дырэктар Дзятлаўскага ПМС Віктар Адамчык узяў на заметку для работы некаторыя мадэлі. Паездка атрымалася выніковай для жыллёва-камунальнай гаспадаркі раёна: разгледзелі варыянты набыцця сучаснай мадэлі машыны для прыбірання горада. На падыходзе ў беларускіх вытворцаў новая лінейка такога транспарту, першыя мадэлі яны гатовы пратэсціраваць на Дзятлаўшчыне.
Наталля АВЯРЧУК
Фота прадастаўлены ўдзельнікамі выставы
