У рамках раённай цімураваланцёрскай працоўнай акцыі “Снегапад” члены раённага валанцёрскага клуба “Мы разам!”, навучэнцы гімназіі № 1 і сярэдняй школы № 1 горада Дзятлава імя А. М. Чурылы, а таксама каардынатар іх дзейнасці Ірына Мішчанка прынялі актыўны ўдзел у працоўным дэсанце “Чысты помнік”.
Дзеці і педагогі ачысцілі ад снегу помнікі райцэнтра – воінам-інтэрнацыяналістам, а таксама Героям Савецкага Саюза Яну Фогелю і Паўлу Пятрову ў гарадскім парку.
Далучыліся да акцыі і іншыя школы раёна. Дзякуючы сумесным намаганням валанцёраў, памятныя мясціны Дзятлаўшчыны сталі больш дагледжанымі і даступнымі для жыхароў і гасцей горада.
Сваім меркаваннем наконт удзелу ў акцыі падзялілася дырэктар сярэдняй школы № 1 горада Дзятлава імя А. М. Чурылы Марына Нячай:
– Служэнне памяці – гэта служэнне Радзіме. Для дзяцей з клуба “Патрыёт” і валанцёраў удзел у падобных акцыях – не проста добрая традыцыя, а частка іх унутранага кода. Яны растуць у духу павагі да гісторыі, подзвігу продкаў, да тых, хто не шкадаваў жыцця дзеля міру на нашай зямлі. Сёння мірныя дні дазваляюць юнаму пакаленню вучыцца, марыць, будаваць планы, і гэта стала магчымым дзякуючы мужнасці тых, хто адліты ў камні і бронзе. Валанцёрства – гэта не разавая падзея, а лад жыцця, а патрыятызм – не толькі мітынгі і сцягі, але і гатоўнасць у любую хвіліну і надвор’е прыйсці і зрабіць тое, што патрэбна проста таму, што гэта правільна. Такія акцыі – жывы напамін аб тым, што дабро, павага і памяць застаюцца назаўжды.
Падрыхтавала Ірына СТЫРНІК
Фотаздымкі ўдзельнікаў акцыі
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#нашелучшее #нашалепшае
